Шадар сайд, УОК-ын дарга Н.Номтойбаяр ирэх өвлийн бэлтгэл, бэлэн байдлыг хангуулахад анхаарч, Хэнтий аймагт ажиллалаа. 

Энэ үеэр аймаг, орон нутгуудад санхүүгийн эрх мэдлийг шат дараатай нэмж, нэн шаардлагатай хөрөнгө оруулалтын ажлаа өөрсдийн хөрөнгөөр санхүүжүүлдэг байх тогтолцоонд шилжүүлэхээр Засгийн газар ажиллаж байгааг тодотгов.

Хэнтий аймгийн Засаг дарга Д.Аюурбунь аймгийн уул уурхайн 28 аж ахуйн нэгжид хийсэн шалгалтаар илэрсэн зөрчилд 94.5 сая төгрөгийн торгууль ногдуулсан, Жаргалтхаан–Өмнөдэлгэрээс Биндэр сум хүртэлх 152.5 км хатуу хучилттай авто замын төслийн багц 2, багц 5-ын санхүүжилтийг ирэх оны төсөвт багтаах, Батширээт суманд Гал түймэр унтраах, аврах анги байгуулах, Бор-Өндөр суманд Гал унтраах, аврах ангийн барилга шинээр барих, аймгийн төвд баригдаад гацсан дулааны станцын барилгын ажлыг эрчимжүүлэх зэрэг асуудлыг танилцуулав.

Гамшгаас хамгаалах тухай хуулийн шинэчилсэн найруулгын төслөөр Онцгой байдлын байгууллагууд зөвхөн улсын төсөв хүлээх бус хувийн хэвшилтэй хамтрах, өөрсдийн санхүүжилтээр техник, тоног төхөөрөмжөө үе шаттай шинэчилдэг байх эрх зүйн орчин бүрдэх юм. Эдийн засгийн тусгай бүсийн тухай хуулийн төслөөр орон нутгууд газар, татварын хөнгөлөлт, чөлөөлөлт зэргээр эдийн засгийн таатай орчныг хөрөнгө оруулагчдад бүрдүүлж, нэмүү өртөг шингэсэн, экспортын чиг баримжаатай боловсруулах үйлдвэрлэл хөгжүүлэх боломжтой болохыг Шадар сайд онцоллоо. 

Түүнчлэн, малаа тоолохдоо тоо толгой, үүлдэр, ашиг шимийн онцлогийг нарийвчлан бүртгэсэн мэдээллийн нэгдсэн сан бүрдүүлэх, газар, уул уурхай, бэлчээр ашиглах, үл хөдлөх хөрөнгийн нэгдсэн мэдээлэл бий болгож эдийн засгийн эргэлтэд оруулах, байгууллага хоорондын өр төлбөрийг үе шаттай шийдэх чиглэлээр холбогдох байгууллагуудад үүрэг даалгавар өгчээ.