Цөлжилттэй тэмцэх тухай НҮБ-ын конвенцын талуудын 17 дугаар бага хурал буюу COP17-г Улаанбаатар хотноо энэ сарын 17-28-нд зохион байгуулах талбай, барилга байгууламжийн ажлын явцтай хэвлэл мэдээллийнхэн /2026.07.31/ танилцлаа.
Гадаадын 4500 гаруй зочид, төлөөлөгч оролцох тус хуралд зориулан Үндэсний цэцэрлэгт хүрээлэнгийн зүүнтээ барьж буй дөрвөн томоохон байгууламжийн үндсэн барилга угсралтын гүйцэтгэл 90 гаруй, дотор тохижилт, тайз дэлгэцийн угсралт 70, өргөн чөлөө, явган хүний зам, ногоон байгууламжийн ажил 80 гаруй хувьтай үргэлжилж байна. Эдгээр барилга байгууламжийг наймдугаар сарын 5-нд хүлээлгэж өгөөд талбайн тэмдэг, тэмдэглэгээ хийх, сандал, сүүдрэвч тавих, амьд ургамал, бут сөөгөөр чимэх, тавилга суурилуулах зэрэг дотоод тохижилт, зохион байгуулалтаа үргэлжлүүлнэ.
Төслийн талбайд гадаадын хөрөнгө оруулалттай гурав, дотоодын 18 компанийн 500 гаруй хүн ажиллаж байна. Байгууламж тус бүрдээ 30 гаруй өрөөтэй, эдгээрт 350 гаруй хурал, зөвлөгөөн болно. Талбайн голд барьсан том цомцог гэрийн диаметр нь 36 метр, өвлийн дулаалгатай, голын тооно нь гэхэд 10 ханатай гэрийн хэмжээтэй бөгөөд энд Засгийн газрын томоохон төлөөлөгчдийн уулзалт болох юм. СОР17 хурлын үйл ажиллагаа “цэнхэр”, “ногоон” гэсэн хоёр бүсэд өрнөнө. “Цэнхэр” хэсэгт хурлын үндсэн үйл ажиллагаа болж, “ногоон” хэсэгт иргэд иргэний үнэмлэхээрээ “ногоон” бүсэд зохион байгуулж буй үйл ажиллагаатай танилцах боломжтой. “Цэнхэр” бүс нь НҮБ-ын нутаг дэвсгэр гэж үзэх учир тус байгууллагын аюулгүйн ажиллагааны дүрэм, журмыг баримтлах ажээ.
БОУАӨ-ийн сайд Ц.Сандаг-Очир:
-“COP17 хурал бол дан ганц Засгийн газар, нэг яамны ажил биш Монгол Улсын нэр хүндтэй холбоотой учир бүгд хичээж байна. Хурлаар Монголд тулгамлаж буй цөлжилтөөс гадна дэлхий нийтийн газрын доройтлыг хэлэлцэж, шийдэл гаргана.
Үр дүнд нь Монгол талд шаардлагатай санхүүжилт, дараагийн 10 жилд хэрэгжих төсөл хөтөлбөрийг татах ач холбогдолтой. Цөлжилттэй тэмцэх сайн туршлага, цаашид хийх ажил, хөрөнгө оруулалт татах, шинэ санаачилга нь хурлын үр дүн болох юм. Хурал зохион байгуулсан техник хэрэгсэл, тоног төхөөрөмж, эд хогшил монголд үлдэнэ.
Тухайн үед нь бүртгэн авч, шаардлагатай албан байгууллага, сургуульд өгөх боломжтой” гэв.
СОР17 “Хөрөнгө оруулалт, бүтээн байгуулалтын газар” ОНӨААТҮГ-ын дарга Б.Баттулга:
-"Бүртгэлийн хэсгээс үндсэн заал хүртэл 800 метр зайтай тул 15-16 хүн суух цахилгаан жижиг тэрэг үйлчилнэ. Энэ газарт 10 МВт хүчин чадалтай цахилгааны дэд станц суурилуулан, төвийн усан хангамж, ариутгал хатгуурын шугам холбож, ус зайлуулах системийг шийдсэн. 680 орчим авто машины зогсоолтой. Ариун цэврийн зөөврийн 20 ширхэг байгууламж байршуулж, дотор талбайд 80 хүний багтаамжтай, ариун цэврийн стандартын шаардлага хангасан хоёр байгууламж барьсан. Байгальд ээлтэй технологи ашигласнаас гадна шашны онцлогт нь зориулж төлөвлөсөн хэсэг ч бий. Бүх булан тохой, талбайг камержуулсан” гэв.
БОУАӨЯ-ны Гадаад хамтын ажиллагааны хэлтсийн дарга Д.Ариунтуяа:
-“Монгол Улсын Засгийн газар энэ хуралд “Тал хээрийн төлөвлөгөө” бодлогын баримт бичгээ танилцуулна. Бэлчээр, ус ба газрын нэгдсэн менежмент, байгальд суурилсан шийдэл бүхий тогтвортой дэд бүтэц гэсэн гурван үндсэн агуулгатай. Гадаад улс орнууд Монгол Улсыг тал хээр нутаг гэж хардаг учир ийн нэрлэсэн. Бэлчээр гэдэг нь зөвхөн мал бэлчдэг газар бус өндөр уул, ойн сангаас бусад бүх төрлийн газрыг хэлдэг. Монгол орны газар нутгийн 80 хувь бэлчээрийн ангилалд багтдаг. Газрын гадарга халах нь ихсэж, ургамлын нэр төрөл, тоо цөөрч, газар хөрсгүй болоод ирэхээр цөлжиж доройтон, ган нүүрлэдэг. Иймд бэлчээр буюу хуурай газрыг хамгаалах нь эхний ач холбогдол” хэмээн тодотголоо.
