Сайд Ж.Алдаржавхлан Бүгд Найрамдах Солонгос Улсын Пусан хотноо зохион байгуулж буй Дэлхийн өвийн хорооны 48 дугаар чуулганд оролцож байна. Дэлхийн өвийн төвийн захирал Лазаре Елондоу Ассомотой өнөөдөр уулзаж, санал солилцлоо.
Тэрбээр Дэлхийн өвийн хорооны ээлжит чуулганы амжилттай зохион байгуулж байгаад баяр хүргээд, Монгол Улсын Засгийн газраас дэлхийн өвийг хамгаалах чиглэлээр хэрэгжүүлж байгаа үйл ажиллагааны талаар товч танилцуулав. Дэлхийн өвийн төвийн захирал Лазаре Елондоу Ассомо Монгол Улс дэлхийн өвийн хорооны гишүүнээр сонгон чуулганы үйл ажиллагаанд идэвхтэй оролцож байгаад сэтгэл хангалуун байгаагаа илэрхийлж, амжилт хүслээ.
Мөн Монгол Улсыг ЮНЕСКО-ийн 2001 оны Усан доорх соёлын өвийг хамгаалах конвенцыг соёрхон баталж, ЮНЕСКО-ийн соёлын өвийг хамгаалах бүх конвенцод нэгдэн орсон цөөхөн улсын нэг болсныг онцлон тэмдэглэж, баяр хүргэлээ.
Уулзалтын үеэр хоёр тал хамтын ажиллагаагаа идэвхжүүлж, ойр нягт хамтран ажиллах талаар санал нэгтэй байгаагаа илэрхийлсэн талаар ССАЖЗЯ-наас мэдээлэв.
Дэлхийн өвийн төв нь ЮНЕСКО-ийн 1972 оны Дэлхийн соёлын болон байгалийн өвийн хамгаалах конвенцын хэрэгжилтийг зохицуулах үндсэн чиг үүрэгтэй байгууллага юм.
