УИХ-ын дарга М.Энхболд цаг үеийн асуудлаар мэдээлэл хийлээ. Тэрээр,

-Ерөнхийлөгчийн өргөн мэдүүлсэн УИХ-ын дэгийн тухай, УИХ-ын тухай хуульд нэмэлт өөрчлөлт оруулах тухай хуулийн хэрэгжилт өнөөдрөөс эхэлж байна. 

УИХ-ын нэр бүхий 39 гишүүн гарын үсэг зурсан, УИХ-ын даргыг чөлөөлөх тухай хүсэлт тавьсан тогтоолын төслийг 20 минутын надад оруулж ирлээ. Миний бие тогтоолын төслийг хүлээж аваад 20 минут болж байна. Энэ асуудлыг УИХ яаралтай горимоор хэлэлцэх хуулийн дэгтэй. Үүний тулд УИХ-ын Даргын зөвлөл хуралдах ёстой. Захирамж гарч байж хэлэлцдэг гэсэн үг.

Асуудал хэрхэн яаж хэлэлцэх талаар 13:00 цагт УИХ-ын Даргын зөвлөл хуралдаж шийдвэрээ гаргана. Мөн УИХ-ын Төрийн байгуулалтын Байнгын хорооны даргатай санал солилцсон. Хамгийн наад талын хугацааг тооцоход чуулганыг ирэх Мягмар гарагт хийх бололцоотой байна. 

Хууль хэдийгээр өнөөдөр хэрэгжиж эхэлж байгаа ч 29-нд чуулганаар хэлэлцэнэ гэж байгаа нь тодорхой шалтгаантай. Хуулийг хэрэглэх явдал бол Дэгийн тухай хуульд заагдсаны дагуу Төрийн мэдээлэл сэтгүүлд мэдэгдсэнээр хэрэгжинэ гэсэн заалттай. УИХ-аас гарсан шийдвэрийг хэвлэдэг Төрийн мэдээлэл сэтгүүлийг хэвлэлийн байгууллагад өгсөн, 28-ны Даваа гарагт сэтгүүл хэвлэгдэнэ.

Нөгөө талаас тус асуудлыг хэлэлцэхэд энэ долоо хоногийн хуваарьт ороогүй тул энэ долоо хоногт хуралдвал Дэгийг зөрчиж байна гэсэн үг.

Миний бие хэд хэдэн удаа өмнө дурдаж байсан. Би ямар нэгэн ажил, албан тушаалтай зууралдаж байгаа зүйл байхгүй. Хуулийн дагуу, хуульд заасан үндэслэлээр ажлаа өгч огцроход бэлэн байна. Удахгүй болох гэж буй Цагаан сарын баярын өмнө шинэ Их хурлын дарга томилогдох боломжтой. Пүрэв гарагт хуралдах ёстой байсан чуулганыг хоёр хоногоор нааш нь татаж ирэх 29-ний өдөр хуралдуулах болж байна" гэлээ.

Товчхондоо, өнөөдөр УИХ-ын даргын зэвлэл хуралдаж УИХ-ын даргыг огцруулах асуудлыг хэлэлцэх журам болон товыг гаргахаар болов.