Нийгмийн сүлжээнд хүүхдийн аюулгүй байдлыг хангах тухай хуулийн төслийн үзэл баримтлалыг баталсны дараа эхний хэлэлцүүлгийг цахимаар болон сургуулиудад хийж, 6000 гаруй хүүхдийг хамруулснаас 1700 гаруйтай нь биечлэн уулзаж, 606 хүүхдээс судалгаа авчээ.

Судалгаанд оролцогчдын 81.4 хувь нь өдөрт гурваас дээш цагийг цахим орчинд өнгөрүүлдэг гэсэн бол 41 хувь нь таваас дээш цаг дэлгэцийн өмнө суудаг гэжээ. Тэдний хамгийн түгээмэл ашигладаг платформ нь Instagram-84.7, YouTube-58.6, TikTok-53.1 хувь байгааг Засгийн газрын ХМОНХГ мэдээлэв.

Хүүхдүүдийн 37.3 хувь нь танихгүй хүнээс чат, мессеж хүлээн авч байсан, 26.7 хувь нь хуурамч хаяг, залилан, 22.4 хувь нь бэлгийн агуулгатай контент, 18.3 хувь нь цахим дээрэлхэлт, доромжлол, 11.1 хувь нь амиа хорлох, өөрийгөө гэмтээхийг өдөөсөн контент харж байсан гэж хариулжээ. Түүнчлэн 70 хувь нь цахим орчин дахь хамгаалалт, зохицуулалтыг дэмжиж буйгаа илэрхийлсэн байна. Мөн 88.1 хувь нь насанд тохироогүй контентыг хязгаарлах, 84.7 хувь нь ёс бус сэтгэгдлийг автоматаар устгах, 84.3 хувь нь байршлын мэдээллийг хамгаалах, 81.7 хувь нь хувийн хаягийг хаалттай болгох, 79.4 хувь нь танихгүй хүнээс чат бичихийг хязгаарлах шаардлагатай гэжээ.

Нийгмийн сүлжээнд хүүхдийн аюулгүй байдлыг хангах тухай анхдагч хуулийн төслийн хэлэлцүүлэг хоёр дахь долоо хоногтоо үргэлжилж, энэ удаад багш, сурган хүмүүжүүлэгчдийг хамруулсан хэлэлцүүлэг өрнүүлэв. Тус хуулиар цахим орчинд хүүхдийн аюулгүй байдлыг хамгаалах, тэднийг гэмт хэрэг, зөрчлийн хохирогч болохоос сэргийлэх, сөрөг агуулгатай контентоос ангид байлгах, цахим аюулгүй байдлын мэдлэг олгох зэрэг харилцааг зохицуулах юм. Хуулийн хэрэгжилтэд багш, сурган хүмүүжүүлэгчийн оролцоо чухал тул боловсролын байгууллага, багш, нийгмийн ажилтан, сэтгэл зүйчдийн эрх үүрэг, тулгамдсан асуудлын гарц шийдлийг ярилцаж, хуулийн төсөлд тусгах нь хэлэлцүүлгийн зорилго юм. Хэлэлцүүлэгт ерөнхий боловсролын сургуулийн 250 гаруй багш, нийгмийн ажилтан, сэтгэл зүйч оролцлоо.