Японы Айчи муж болон Нагояа хотод зохион байгуулах Азийн зуны спортын ХХ наадам 20 хоногийн дараа нээлтээ хийнэ.

“Айчи-Нагояа 2026”Азийн наадмыг энэ удаа  “Imagine One Asia” уриан дор зохион байгуулах бөгөөд 15 хоногийн турш үргэлжилнэ. Тус наадамд Монгол Улсаа төлөөлж спортын 31 төрөлд 303 тамирчин өрсөлдөх юм. Тэгвэл баг тамирчдыг үдэн гаргах ёслолын үйл ажиллагааг Монголын үндэсний олимпын хорооноос COP17 цогцолборын “Монгол Улсын өргөө” гэрт зохион байгууллаа.

Үйл ажиллагаанд ОУОХ-ны гишүүн, МҮОХ-ны ерөнхийлөгч Б.Баттүшиг, Нийслэлийн Засаг дарга бөгөөд Улаанбаатар хотын захирагч Б.Пүрэвдагва, “Айчи-Нагояа 2026”Азийн наадамд өрсөлдөх Монголын багийн ахлагч, УИХ-ын гишүүн, МЖБХ-ны ерөнхийлөгч Х.Баттулга, Монголын багийн дэд ахлагч УИХ-гишүүн Х.Булгантуяа, МҮОХ-ны гишүүд,  хүндэт зочид тамирчид, дасгалжуулагч, албаны төлөөлөл оролцов. Шар тивийн 20 дахь удаагийн наадмын нээлтэд Монголын багийн тугчаар дээд лигийн “Хасын Хүлэгүүд”-ийн тоглогч, 3х3 сагсан бөмбөгийн шигшээ багийн тамирчин, олон улсын хэмжээний мастер Ч.Тэмүүлэн, волейболын үндэсний шигшээ багийн тамирчин П.Энххүслэн нарыг сонгожээ. Тэд нээлтийн ёслолд Нагояа хотын цэнгэлдэх хүрээлэнд Монголын төрийн далбааг мандуулах юм.

Япон Улс Азийн наадмыг гурав дахь удаагаа зохион байгуулж буй  бөгөөд өмнө нь “Токио-1958”, “Хирошима-1994” онд тус наадмыг хүлээн авч байв. 20 дахь удаагийн Азийн наадамд 45 Үндэсний олимпын хорооны ойролцоогоор 15 мянган тамирчин, албаны төлөөлөгч 43 спортын 71 төрөл, 469 багц медалийн төлөө өрсөлдөнө.