Чингэлтэй дүүргийн иргэний хэргийн анхан шатны шүүхээс 2019 оны нэгдүгээр сарын 17-ний өдөр УИХ-ын гишүүн Л.Оюун-Эрдэнийг эрэн сурвалжлах иргэний хэргийг үүсгэх захирамж гаргажээ. Гишүүн Л.Оюун-Эрдэнэ нь “..хууль хяналтын байгууллагууд М.Энхболд гэх хүнийг хамгаалах гэж, ...гишүүдийн гэр бүлийн гишүүдийг баривчлах ажиллагаа явагдах байна.. ” хэмээсэн бөгөөд ийм зүйл болоогүй талаар хуулийн байгууллагууд албан ёсоор мэдэгдэл хийгээд байсан юм.

Бусдыг гүтгэх нь хуулиар хориотой бөгөөд үндэслэлгүй, гүтгэлгийн шинжтэй мэдээлэл цацсантай нь холбоотойгоор Баянзүрх дүүргийн хаягаар нь иргэний хэрэгт хариуцагчаар дуудсан боловч Л.Оюун-Эрдэнэ нь бүртгэлтэй хаяган дээрээ оршин суудаггүй бөгөөд хариуцагчаар татсан тогтоолыг нь хүлээн аваагүй байна.  

Иргэний хуулийн 21-р зүйлд “Иргэний нэр, нэр төр, алдар хүнд, ажил хэргийн нэр хүндийг гутаасан мэдээ тараасан этгээд түүнийхээ үнэн зөвийг нотолж чадахгүй бол эрх нь зөрчигдсөн этгээдийн шаардлагаар уг мэдээг тараасан хэлбэр, хэрэгслээр няцаах үүрэг хүлээнэ” гэж заасан байдаг аж.