Өнгөрөгч долоо хоногт НИТХ-ын ээлжит бус чуулганаар Улаанбаатар хотын захирагч бөгөөд Нийслэлийн Засаг даргыг сонгосон. Хачирхалтай нь хотын даргыг сонгох санал хураалтын үеэр МАН-ын Удирдах зөвлөл болон НИТХ дахь МАН-ын бүлгээс 100 хувийн саналаар дэмжигдэж гарч ирсэн НИТХ-ын дарга С.Амарсанаа ялагдал хүлээж, заалнаас нэр дэвшсэн “битүү морь” С.Мөнхчулуун Улаанбаатар хотын захирагч бөгөөд нийслэлийн Засаг даргаар сонгогдсон юм.
Эхний санал хураалтаар С.Амарсанаа 23, С.Мөнхчулуун 22 санал авч, С.Амарсанаа ялалт байгуулсан боловч тооллогын комисс “саналын хуудас тэмдэглэгээтэй байсан” гэдэг шалтгаанаар С.Амарсанаагийн нэг саналыг хүчингүй болгосноор санал тэнцэж, дахин санал хураалтаар С.Мөнхчулуун олонхийн санал авч нийслэлийн Засаг даргаар сонгогдсон юм. Хэрэв МАН-ын дарга, Ерөнхий сайд У.Хүрэлсүх санал хураалтын дүнг хүлээн зөвшөөрч, С.Мөнхчулууныг батламжилбал (Засгийн газар лхагва гаригт хуралдана) нийслэлчүүд энэ долоо хоногт шинэ даргатай болно.
