Ерөнхийлөгчийн тамгын газрын дарга Зандаахүүгийн Энхболдыг Монголын Жүдо бөхийн холбооны тэргүүн дэд ерөнхийлөгчөөр томилжээ. Монголын жүдо бөхийн холбооны удирдах зөвлөл өнгөрсөн баасан гаригт хуралдаж, зарим томилгоог хийсэн байна.
Өмнө нь Монголын Жүдогийн холбооны тэргүүн дэд ерөнхийлөгчөөр Хууль зүйн сайд асан Д.Дорлигжав, "Маск"-ын Д.Ганбаатар, Ховд аймгийн жүдогийн холбооны тэргүүн Ш.Адъшаа, Гадаад хэргийн сайд Д.Цогтбаатар нар ажиллаж байжээ.
Холбооны тэргүүн дэд ерөнхийлөгч З.Энхболд нь "Токио-2020" олимпийн наадамд Монголын жүдо бөхийн шигшээ багийг ахалж оролцох юм байна.
Жүдо бөхийн холбооны тэргүүн дэд ерөнхийлөгчөөр томилогдсон З.Энхболд нь:
- 1984 онд Сэлэнгэ аймгийн Сүхбаатар хотын 10 жилийн дунд сургууль
- 1989 онд ОХУ-ын Уралын Политехникийн дээд сургууль Автоматик телемеханикийн инженер мэргэжлээр
- 1996 онд Монгол Улсын Их Сургууль Эрх зүйч мэргэжлээр тус тус төгссөн.
- 2004 онд АНУ-ын Денверийн Их Сургуульд ОУ-ын Бизнесийн удирдлагын магистрын зэрэг хамгаалсан.
- 1989 онд Улаанбаатар цахилгаан шугам сүлжээнд монтёр
- 1989-1991 онд “Монел” фирмд инженер
- 1991-1993 онд “Эрэл” ХХКомпаний захирал
- 1993-1996 онд “Интер” ХЭАА ХХКомпанид захирал
- 1996-1999 онд Төрийн өмчийн хорооны дарга
- 1999-2000 онд УИХ-ын даргын зөвлөх
- 2000-2001 онд Ардчилсан намын Ерөнхий нарийн бичгийн дарга
- 2004-2005 онд Төрийн өмчийн хорооны дарга
- 2005-2016 онд Монгол Улсын Их Хурлын гишүүн
- 2012-2016 онд Монгол Улсын Их Хурлын даргаар ажиллажээ.
