Америкийн жүжигчин, тулааны урлагийн мастер Чак Норрис 86 насандаа таалал төгсжээ. Пүрэв гаригийн өглөө нас барсан тухай түүний гэр бүлийнхэн баасан гаригт Instagram хуудсаараа дамжуулан мэдээлсэн байна. Түүнийг Хавай муж улсын Кауаи арал дээр байхдаа тодорхойгүй шалтгаанаар эмнэлэгт хүргэгдсэн тухай хэвлэлүүд өмнө нь мэдээлж байв. "Дэлхий нийтийн хувьд тэр тулааны урлагийн мастер, жүжигчин, хүч чадлын бэлгэ тэмдэг байсан. Харин бидний хувьд тэр үнэнч хань, халамжит аав, өвөө, гайхалтай ах, манай гэр бүлийн зүрх сэтгэл нь байсан” хэмээн мэдэгдэлд дурдсан байна. Норрисын гэр бүл түүний нас барсан шалтгааныг дурдаагүй бөгөөд “гэр бүлийнхнийхээ дэргэд амар тайвнаар хорвоог орхисон” гэж мэдэгджээ.

Техас муж улсын захирагч, АНУ-ын Ерөнхийлөгч болон жүжигчид эмгэнэл илэрхийлэв

“Чак Норрис таалал төгссөнд Техас даяараа гашуудаж байна. Тэр бол зөвхөн тулааны урлагийн аварга төдийгүй, тулаант адал явдалт киноны бэлгэ тэмдэг, мөн цорын ганц, давтагдашгүй Техасын рейнжер Уокер байсан” хэмээн Техасын захирагч Грег Эбботт мэдэгджээ. АНУ-ын Ерөнхийлөгч Дональд Трамп  түүнийг “үнэхээр сайн, хатуу чанга залуу” хэмээн тодорхойлоод “түүнтэй зодолдохыг хэн ч хүсэхгүй” гэж нэмж хэлжээ. Ч.Норрис 2016 оны сонгуулиар Трампыг дэмжиж байсан юм.

“Би зүрх сэтгэлээрээ түүний гэр бүлийнхэнтэй хамт залбирч байна. Түүнийг хэзээ ч мартахгүй” хэмээн Холливудын нэрт жүжигчин Жан-Клод Ван Дамм хэллээ. Мөн Сильвестр Сталлоне, Ли Мэйжорс, Арнольд Шварценеггер зэрэг Норристой хамтран ажиллаж байсан олон жүжигчин эмгэнэл илэрхийлжээ.

Оклахомагаас гаралтай тулаант адал явдалт киноны домог

Карлос Рэй Норрисд 1940 онд Оклахома муж улсын Райан хотод автомеханик аав, ням гаригийн сургуулийн багш ээжийн гэр бүлд төржээ. Сургуулиа төгсөөд Өмнөд Солонгос дахь АНУ-ын Агаарын цэргийн хүчинд алба хаах хугацаандаа “Чак” гэдэг хочтой болсон байна.

1962 онд цэргээс халагдаж, Лос-Анжелест тулааны урлагийн студи нээжээ. Тэрбээр 1968 онд Дин Мартины найруулсан “Эвдэн сүйтгэгчдийн баг” кинонд жижиг дүр бүтээснээр анх кино урлагт хөл тавьсан байна. Харин дөрвөн жилийн дараа Брюс Литэй хамтран тоглосон “Луугийн зам” кинонд тоглосноор алдаршсан юм.

Түүнийг алдаршуулсан өөр нэг кино бол 1983 онд гарсан “Ганцаардсан чоно Маккуэйд” кино бөгөөд уг бүтээлд Норрис Техасын рейнжерийн дүрд тоглож, хууль бус наймаачинтай ширүүн тэмцдэг. Мөн 1993-2001 онд гарсан “Уокер, Техасын рейнжер” олон ангит киноны Корделл Уокерын дүрээрээ алдартай.

Шүүмжлэгчид Норрисын кинонуудыг төдийлөн таашаадаггүй байсан бол үзэгчид түүнийг болон түүний бүтээлүүдийг халуун дотноор хүлээн авч байв. Тэрбээр шударга ёсны төлөө ганцаараа тэмцэгч, зөвхөн гарцаагүй үед л хүч хэрэглэдэг залуугийн дүрээрээ алдаршсан юм.