“Аялал жуулчлалын 7 хоног-2026” үндэсний чуулганы “Оюутан залуусын өдөр”-т “Спарк” агентлагийн гүйцэтгэх захирал Э.Дөлгөөн “Physical Asia” контентын нөлөө аялал жуулчлалд хэрхэн эерэг нөлөө үзүүлж байгааг танилцуулжээ.

Тухайлбал, Монгол Улсын Арслан Б.Орхонбаярын бэлтгэлийг үзэхээр Солонгос, Тайландын жуулчид урьдчилан зөвшөөрөл авч, бэлтгэлийн хэсгийг үзэж байгаа нь спортын контент жуулчдыг татах шинэ хандлагыг харуулж байна. Монгол Улсын Гавьяат жүжигчин, уран нугараач Э.Лхагва-Очирын үзүүлбэрийг үзэхийн тулд заавал ХБНГУ руу явах шаардлагагүй болж, энэ зун “ARA” фестивалийн үеэр Монголд тоглолт хийхээр төлөвлөжээ. Дэлхийн хүчний спортын тамирчин Эдди Уилламс “ARA” фестивалийн нүүр царайгаар ажиллаж, “Physical Asia” баг Монголд ажиллаж, контент бүтээхээр төлөвлөж байгаа ажээ.

Илтгэлд мөн Монголын тамирчдын сошиал дагагчид 10 мянгаас 500 мянга хүртэл өссөн нь олон улсын нөлөөлөгчидтэй хамтран Монгол Улсыг сурталчлах боломж болж байгааг онцолсныг Аялал жуулчлалын мэргэжлийн холбооны мэдээлэв.

Түүнчлэн, аялал жуулчлал, зочлох үйлчилгээний салбарын ирээдүйд хиймэл оюун, их өгөгдлийн технологи чухал үүрэг гүйцэтгэх болсныг БНСУ-ын Соган их сургуулийн судлаач, профессор Иан Сазерлэнд “AI ба Big Data аялал жуулчлалд” илтгэлдээ онцолжээ. Тэрбээр аялал жуулчлал нь дэлхийн хамгийн динамик салбарын нэг бөгөөд ажлын байр бий болгох, бүс нутгийн эдийн засгийг дэмжих, соёлын солилцоог өргөжүүлэх үүрэгтэй ч байгаль орчин, дэд бүтэц, орон нутагт тодорхой дарамт үүсгэдэг. Иймээс COP17-гийн эрин үед тогтвортой аялал жуулчлалыг хөгжүүлэхэд зөвхөн сайн санаа хангалтгүй, илүү ухаалаг, өгөгдөлд суурилсан шийдвэр гаргах систем шаардлагатай. Хиймэл оюун, өгөгдлийн шинжлэх ухаан нь энэ системийг бий болгоход чухал үүрэг гүйцэтгэх боломжтойг тэмдэглэжээ.

Аялал жуулчлалын салбарт одоогоор хиймэл оюуныг жуулчдын урсгал, зах зээлийн эрэлтийг таамаглах, зочид буудал, нислэгийн динамик үнэ тогтоох систем, хэрэглэгчийн үнэлгээ, сэтгэгдлийг текст анализ ашиглан боловсруулах, аяллын төлөвлөлт, захиалгын систем, чатбот, автомат харилцагчийн үйлчилгээ, байгууллагын хүний нөөц, хуваарь, үйл ажиллагааны оновчлолд ашиглаж байна. Хиймэл оюуныг ашиглахдаа мэдээллийн нууцлал, алгоритмын хазайлт, буруу мэдээлэл үүсэх эрсдэлд анхаарах шаардлагатайг ч онцолжээ.