Ираны эсрэг АНУ, Израилийн хамтарсан цэргийн ажиллагааны дараа дэлхийн газрын тосны нийлүүлэлтэд доголдол үүсэж, зах зээл дээрх үнэ огцом өсөв. Үнийн огцом хэлбэлзлийг тогтворжуулах зорилгоор АНУ стратегийн газрын тосны нөөцөөсөө 172 сая баррель нефть гаргахаар шийдвэрлэснийг тус улсын Эрчим хүчний сайд Крис Райт мэдэгдлээ.

Энэ шийдвэр нь Олон улсын эрчим хүчний агентлагийн гишүүн 32 орны хамтарсан арга хэмжээний хүрээнд хэрэгжиж буй бөгөөд дэлхийн зах зээлд нийт 400 сая баррель газрын тос нийлүүлэхээр тохиролцсон байна.

АНУ стратегийн нөөцөөсөө газрын тос гаргах ажиллагааг ирэх долоо хоногоос эхлүүлж, ойролцоогоор 120 хоногийн хугацаанд үе шаттайгаар зах зээлд нийлүүлэхээр төлөвлөжээ.

Ойрхи Дорнодод үүссэн хурцадмал байдал нь дэлхийн газрын тосны зах зээлд томоохон дарамт үзүүлж эхэлсэн. АНУ, Израилийн хамтарсан цэргийн ажиллагаа хоёрдугаар сарын 28-нд эхэлсний дараа Иран хариу цохилт өгч, бүс нутгийн хэд хэдэн улс дахь Америкийн цэргийн баазуудыг онилсон пуужин, дроны довтолгоо хийсэн.

Мөн Ираны хувьсгалын харуулын корпус Персийн булангийн бүс дэх газрын тос тээвэрлэлтийг зогсоох талаар анхааруулж, Ормузын хоолойгоор дамжин өнгөрөх танкеруудын хөдөлгөөн эрс саарчээ.

Ормузын хоолой нь Персийн болон Оманы буланг холбодог стратегийн чухал гарц бөгөөд дэлхийн газрын тосны нийлүүлэлтийн тавны нэг орчим нь энэ хоолойгоор дамжин өнгөрдөг. Бүс нутагт мөргөлдөөн эхлэхээс өмнө өдөрт ойролцоогоор 20 сая баррель газрын тос тээвэрлэгддэг байв.

Ийм нөхцөл байдал нь дэлхийн эрчим хүчний зах зээлд тодорхойгүй байдал үүсгэж, олон улсын нефтийн үнийг огцом савлуулахад хүргэсэн байна.