Уих-ын таван гишүүн дөнгөж сая төрийн ордонд уих-ын дарга м.Энхболдтой уулзаж шаардлагынхаа хариуг авчээ.

Товчхондоо шаардлагыг хүлээж авах боломжгүй гэдэг хариу өгсөн байна.

Уих-ын гишүүн Л.Болд энэ талаар "Талбай дээр 50-60 мянган хүн биднийг хүлээж байгаа. Бид энэ хүн ийм хариу өгнө гэж бодоогүй. Эрхбиш ард түмний уур хилэн, тэмцлийн өмнө арай ухаалаг шийдвэр гаргах байх гэж бодсон. Одоо бид жагсаалаа үргэлжлүүлээд 40-50 гэр бариад хугацаагүй суулт хийнэ. Энэ хүртэл бид маш тайван замаар тэмцэж ирсэн. Одоо бид хяналтаа алдлаа. Хэрвээ цаашид ямар нэгэн үймээн самуун, эмх замбараагүй байдал гарвал бид хариуцахгүй. Уих-ын дарга М.Энхболд хариуцна" гэлээ

УИХ-ын гишүүн Л.Оюун-Эрдэнэ "УИХ-ын дарга ажлаа өгөхгүй гэлээ. Тэрбээр өөрийн хийсэн ажлаа олон нийтэд танилцуулж өгөөч гэж байна. Бидний зүгээс олон нийтэд М.Энхболд даргын энд ярьсан зүйлийг хэлнэ. Үүний дараа бид гэрээ барьж өлсгөлөн зарлана. Гэхдээ бид үймээн самуун дэгдээж болохгүй. Жагсаалын зорилгыг өөрчлөх МАНАН-гийн гар хөл болсон хүмүүсийн зорилгыг биелүүлж болохгүй. М.Энхболд гэж хүн нийгмийн уур амьсгалыг мэдрэхгүй байна" гэв.

Тэд одоо Үндэсний Аюулгүй Байдлын зөвлөлийн бусад гишүүн болох Ерөнхийлөгч, Ерөнхий сайдтай уулзахаар болжээ. 

Д.Сүхбаатарын талбайд иргэдийн жагсаал үргэлжилж байна.