МАНАН дэглэмийг эсэргүүцсэн, МАН, АН-ын (УИХ-ын хоёр ч гишүүн нь нэгдээд байгаа. Ж.Батзандан намаасаа хөөгдсөн ч Л.Болдыг хөөж чадахгүй байгаа) жагсаал Сүхийн талбайд хоёр дах удаагаа болж байна. Өмнөх жагсаал оны өмнө болж МАНАН дэглэмийн “сүүлчийн хий үзэгдэл” болсон М.Энхболдыг албан тушаалаас нь огцруулахын тулд “албан тушаалаасаа сайн дураараа чөлөөлөгдөх” шаардлага тавин жагссан билээ. Жагсаалыг зохион байгуулагчид “30 000 монгол жагслаа” гэж, эсэргүүцэгчид нь “3000 хүн ирлээ” гэсээр жагсаал дууссан.

Харин энэ удаагийн жагсаалд хөдөө орон нутгаас хүмүүс ирж оролцож байгаа гэдгээрээ онцлог. УИХ-ын гишүүн Л.Оюун-Эрдэнэ “Жагсаал дуусаад суулт зарлана. 250 орчим хүн өсгөлөн зарлахад бэлэн гэдгээ илэрхийлсэн. Хэрэв их хэмжээний хүн өлсгөлөн зарлавал УИХ-ын гишүүдээ төлөөлж бид ч нэгдэнэ. Гэхдээ арай ч ийм түвшинд хүрэхгүй байх гэж найдаж байна” гэлээ. Өөрөөр хэлбэл түүнд хүрэхээс өмнө М.Энхболд өөрөө өргөдлөө өгөөсэй гэж байгаа юм.

УИХ-ын гишүүн Л.Болд ч мөн адил “Хугацаагүй суулт хийнэ. Улс төрийн ямар л хурц хэлбэр байна, түүнийг ашиглаж М.Энхболдыг унагана. МАНАН-г татан буулгана. Ард түмэн талбайд гарлаа. М.Энхболдод ганц л гарц үлдсэн. Тэр бол өөрөө огцроод энд ирж огцорч байгаагаа мэдэгдэж, ард иргэдээ баярлуулах ёстой. Манай цөөнхийн бүлэг М.Энхболдын хэрэгсэл болж байгаад харамсаж байна. М.Энхболд унах нь гарцаагүй болоод ирэхээр УИХ-ыг тараая гэдэг зүйлийг гаргалаа. Өнөөдөр 250 хүн албан ёсоор өлсгөлөнд оролцох өргөдлөө өгсөн. Тэр дунд УИХ-ын таван гишүүний нэр бий” гэв. 

Нэхүүл нам бус залуусын хөдөлгөөн: 

-Ард түмний итгэл алдарч байна. М.Энхболд өөрөө хүсэлтээрээ огцроод, жагсаалын үеэр гарч ирж үгээ хэлээд, уучлалт гуйх ёстой. Яасан ичдэггүй юм. Нэхүүлийн залуус энэ байтугай хувьсгалыг хийнэ. Эхлэл нь М.Энхболд гэдэг хүнийг огцруулах. Жагсаал бүрийг 80, 90 оны жагсаалтай харьцуулаад байна. Жагсахаа тулбал 20 хүн байсан ч жагсаал шүү дээ. Өнөөдрийн жагсаалаас олон зүйл хүлээж байгаа гэв.

Өчигдөр УИХ-ын ТББХ хуралдаад Ерөнхийлөгчийн өргөн барьсан “УИХ-ын гишүүдийн олонхийн шаардлагаар УИХ-ын даргыг огцруулж болно” гэдэг хуулийн заалтыг дэмжсэн. Хуулийн төсөл өнөөдөр УИХ-ын нэгдсэн чуулганаар орох ёстой. Л.Оюун-Эрдэнэ гишүүн энэ хуралдаан дээр байж дэмжсэн санал өгсөн хэрнээ өмнөх шаардлагаа үргэлжлүүлж байгаагаас үзвэл энэ түүнд хангалтгүй бололтой.

Б.ГАЛ