УИХ-ын Халдашгүй байдлын дэд хорооны хурал өчигдөр Г.Солтан гишүүн байгаагүгээс завсарлаж, өнөөдөр үргэлжлүүлэн хуралдахаар болсон. 

Тэгвэл өнөөдөр өглөө Г.Солтан гишүүн онгоцоор ирснээр Халдашгүй байдлын дэд хорооны хуралдаж, дөнгөж сая гаргасан дүгнэлтийг нь УИХ-ын гишүүн Ц.Нямдорж танилцууллаа. 

УИХ-ын гишүүний халдашгүй байдлын дэд хороо УИХ-ын дөрвөн гишүүний бүрэн эрхийг түдгэлзүүлэх асуудлыг УИХ-аар хэлэлцүүлэх шаардлагагүй гэж үзжээ. Учир нь Улсын ерөнхий прокурор М.Энх-Амгалан шалгалт дуусаагүй бөгөөд төгсгөлийн шатандаа орсон талаар танилцуулсан байна. Дөрвөн гишүүн тус бүрдээ нэг удаа АТГ-т очиж мэдүүлэг өгчээ. “Ийм учраас шалгалт дуустал УИХ-ын нэр бүхий дөрвөн гишүүнийг түдгэлзүүлэх асуудлыг шийдвэрлэх боломжгүй гэж үзэж байна” гэлээ. 

УПЕГ-аас нэр бүхий дөрвөн гишүүний бүрэн эрхийг түдгэлзүүлэх саналыг УИХ-д хүргүүлсний дагуу тус Дэд хороо өчигдөр хуралдсан билээ. Дөрвөн гишүүний гурав нь уг хуралд оролцож тайлбараа өгсөн. Харин Г.Солтан гишүүн Баян-Өлгий аймагт томилолттой явсан тул Б.Ундармаа, Д.Дамба-Очир, Л.Энхболд нарын гурван гишүүний асуудлыг хэлэлцсэнээр хурлыг завсарлуулж, ийнхүү өнөөдөр үргэлжилсэн юм.   

Дэд хорооны хуралд өнөөдөр оролцож, тайлбар өгсөн УИХ-ын гишүүн Г.Солтан "Би хуулийн байгууллагад шалгуулахад бэлэн" хэмээсэн юм.