Төрийн байгуулалтын Байнгын хороо Ерөнхийлөгчийн өргөн барьсан Монгол Улсын Их Хурлын чуулганы хуралдааны дэгийн тухай хуульд нэмэлт оруулах тухай хуулийн төсөл, Монгол Улсын Их Хурлын тухай хуульд нэмэлт, өөрчлөлт оруулах тухай хуулийн төслийг хэлэлцэж эхэллээ. Гишүүд хэлэлцэж буй асуудалтай холбогдуулан саналаа хэлж байна.

УИХ-ын гишүүн О.Баасанхүү: 

-УИХ гацна гэдэг маш ноцтой. МАН-ын хэрүүл төрийн хэрүүл зодоон болж байгаад харамсаж байна. Хоёр фракцын зодоон хосгүй шударгын тэмцэл болоод байна. Хандив нэрээр албан тушаалд очих гэж мөнгө авсан бол нэрсийг нь зарлаад зайлуулмаар байна. МАН шийдвэрээ гаргахгүй гэвэл хувьсгал хийхээс өөр арга байхгүй. Намыг нь татан буулгадаг юм уу, төрийн эргэлт хийдэг юм уу мэдэхгүй.

УИХ-ын гишүүн Ж.Мөнхбат:  

УИХ-ын ээлжит сонгуулийг явуулах нь зөв гэж бодож байна. Ерөнхийлөгч хууль санаачилж орж ирж байна. Ардчилсан нам байр сууриа илэрхийлж байна. Яг үнэндээ 64 суудалтай МАН дотроо учраа олж чадаагүй учраас ийм байдалд хүрч 40 хоног гацаж байна. Бие биенийхээ дээр гарахын төлөөх тэмцэлдээ бүгд вакумлагдсан байна. Ийм дээрээ тулсан бол бүгдээрээ таръя. Би хоёр сарын өмнө ийм санал гаргасан. Монголын төрийн дархлаа руу гар дүрж байхаар энэ төрөөс бүгдээрээ явбал яасан юм бэ. Биднээс илүү мэдлэг боловсролтой, ёс зүйтэй хүмүүс байгаа байлгүй дээ. Ачаагаа үүрч чадахгүй бол чаддаг хүмүүст нь өгөх нь дээр. Тиймээс УИХ-ын ээлжит сонгуулийг явуулах нь зөв гэж боддог. 

Магадгүй Ерөнхийлөгчийн өрөн барьсан хуулийн төслийн олонхиороо батлах байх л даа. Батлахдаа хүрвэл ядаж 2/3-оор огцруулдаг заалт оруулж өгөөрэй. Энэ бол төрийн том дархлаа шүү. Эрх мэдэл мөнх биш. Дараагийн УИХ-ын дарга гарахад жаахан гомдохоороо хэдүүлээ нийлээд унгачихдаг байж болохгүй л дээ. Тиймээс ядаж 2/3-ын кнопоор шийддэг болоосой гэж хүсч байна.

УИХ-ын гишүүн Л.Оюун-Эрдэнэ: 

-Хуулийг, ёс зүйг хоёр талаас тайлбарлаж болохгүй. Парламентын дархлаа чухал. Бид заавал ийм хууль батлах албагүй. Нэг хүнд зориулж хууль гаргах ёсгүй. Энэ хууль батлагдахаас өмнө М.Энхболд дарга нийгмийн, парламентын дархлааг бодож шийдвэр гаргах байх гэж өнөөдрийг хүртэл хүлээлээ. 

60 тэрбумтай холбоотой нийтийн сонсгол хийх саналыг Байнгын хороогоор оруулаад буцсан. Ерөнхий прокурорыг сонсоё гэсэн буцсан. Өнгөрсөн наадмаас хойш явсаар ийм байдалд хүрлээ. Тиймээс нэг хүнийг хамгаалахын төлөө парламент тарах нь утгагүй. Харин парламентаа бодоод нэг хүн нь албан тушаалаа өгөх нь ёс зүйтэй гэж бодож байна.