УИХ-ын нэр бүхий дөрвөн гишүүний бүрэн эрхийг түдгэлзүүлэх саналыг УЕПГ-аас өчигдөр орой УИХ-д хүргүүлсэн. Уг саналыг хүлээж авах эсэхийг шийдэхээр УИХ-ын Халдашгүй байдлын дэд хороо хороо хаалттай хуралдаж байна. Дэд хорооны хуралдаанд Дэд хорооны таван гишүүнээс гадна асуудал нь тавигдаад байгаа Г.Солтан, Б.Ундармаа, Л.Энхболд, Д.Дамба-Очир, УЕП М.Энх-Амгалан нар оролцож байна.

Бүрэн эрх нь хөндөгдөөд буй дөрвөн гишүүнээс Л.Энхболд нь "Би ЖДҮХСангаас зээл аваагүй" гэсэн бол М.Ундармаа гишүүн "ЖДҮХС-гаас авсан зээл ямар нэг банк, санхүүгийн байгууллагаар дамжуулаагүй, Б.Батзориг сайдад нөлөөлөөгүй. Гэхдээ түдгэлзүүлэх асуудлаар дэд хороо ямар ч шийдвэр гаргасан түүнийг хүлээж авна" гэлээ. 

Дэд хорооны хуралдаан эхлэхийн өмнө Улсын ерөнхий прокурор М.Энх-Амгалан сэтгүүлчдийн асуултад хариулахдаа "Шалгаж байгаа хэргийн талаар мэдээлэл өгөх боломжгүй байна. Хэргийн шалгалтад саад учруулна гэдэг үндэслэлээр бүрэн эрхийг түдгэлзүүлэхээр оруулж ирсэн. УИХ энэ асуудалд нааштай хандана гэж бодож байна. Б.Батзориг сайдын хувьд ойлгомжтой. Сайдын албан тушаалаа өгөн ч гэлээ УИХ-ын гишүүний бүрэн эрхтэйгээ байгаа тохиолдолд мөрдөн байцаах ажиллагаанд саад учруулж байгаа. Цаашдаа ч учруулах болно" гэлээ.

Халдашгүй байдлын дэд хороонд УИХ-ын хамгийн ахмад гишүүд болох Ц.Нямдорж, Н.Энхболд, Ч.Улаан, Ө.Энхтүвшин, Д.Лүндээжанцан нар багтдаг. Тэдний гаргасан шийдвэрээс дөрвөн гишүүний хувь заяа шалтгаалах юм.