Монгол Улсын Засгийн газар гэмт хэрэгтэй тэмцэх төрийн бодлогын хүрээнд хүний эрх, хууль ёсны ашиг сонирхлыг хамгаалах, хэрэг хянан шийдвэрлэх, шүүн таслах ажиллагааны хараат бус, ил тод байдлыг хангахад чиглэсэн эрх зүйн шинэчлэлийг үе шаттай хэрэгжүүлж байна.

Энэхүү бодлогын нэг чухал бүрэлдэхүүн хэсэг нь эрүүгийн хэрэг хянан шийдвэрлэх ажиллагаанд оролцогчдын аюулгүй байдал, эрх зүйн баталгааг хангах асуудал юм. Хууль зүй, дотоод хэргийн яамнаас эдгээр асуудлыг цогцоор нь шийдвэрлэх, хүний эрх, эрх чөлөө, аюулгүй байдлыг хангах, хэрэг хянан шийдвэрлэх ажиллагааны хэвийн явах нөхцөлийг бүрдүүлэх, үр нөлөөг нэмэгдүүлэх зорилгоор Гэрч, хохирогчийг хамгаалах тухай хуулийн шинэчилсэн найруулгын төслийг боловсруулаад байна. Уг хуулийн төслийн шинэчилсэн найруулгын төслийн олон нийтийн хэлэлцүүлэг тус яаманд энэ сарын 6-нд зохион байгуулсан байна. Хуулийн төслийн хүрээнд эрүүгийн хэрэг хянан шийдвэрлэх ажиллагаанд оролцогчдыг хамгаалах хараат бус, бие даасан тогтолцоог бүрдүүлэх, хамгаалах үйл ажиллагааг олон улсын жишигт нийцүүлэх, хамгаалалтын арга хэмжээ авах нөхцөл, хэлбэр, хэрэгжилтийг нарийвчлан зохицуулахыг зорьсныг Хууль зүй, дотоод хэргийн дэд сайд Д.Мөнх-Эрдэнэ хэлэлцүүлгийн үеэр онцлов.

Гэрч, хохирогчийг хамгаалах тухай хуулийн шинэчилсэн найруулгын төсөлд тусгасан онцлог зохицуулалтуудаас дурдвал, одоогийн хүчин төгөлдөр мөрдөж буй хуулиар хамгаалалтад авж буй зургаан субъектийн хүрээг 16 субъект болгон өргөтгөж, хэрэг хянан шийдвэрлэх ажиллагаанд оролцогчдын эрх, аюулгүй байдлыг хангах үйл ажиллагааг илүү өргөн хүрээнд, дагнасан чиг үүрэг бүхий бие даасан байгууллага хариуцан хэрэгжүүлэхээр тусгасан нь чухал шинэчлэл болж байна. Хуулийн төсөлд хамгаалалтын есөн төрлийн арга хэмжээг хэрэгжүүлэх үндэслэл, журам, хугацааг тодорхой болгосон байна. Мөн гэрч, хохирогчийг хамгаалах үйл ажиллагаа нь нууцлалын өндөр зэрэглэлд явдаг тул уг мэдээллийг задруулсан этгээдэд хүлээлгэх хариуцлагыг чангатгахаар заажээ.

Энэхүү хууль баталснаар иргэд тухайн хэргийг шалгаж буй мөрдөгч, прокуророос хараат бус байдлаар, бие даасан байгууллагад шууд хандаж хамгаалалт хүсэх боломж бүрдэхийн зэрэгцээ, хэрэг хянан шийдвэрлэх ажиллагаа үнэн зөв явах, нийгэмд шударга ёс тогтоход бодитой үр нөлөө үзүүлэх юм.

Үүний үр дүнд, хэрэг хянан шийдвэрлэх ажиллагааны явцад хүний халдашгүй чөлөөтэй байх, эрүү шүүлтээс ангид байх эрх бодитойгоор хангаж, гэрч, хохирогчийг хамгаалах үндэсний тогтолцоо бүрдэн, гэмт хэрэгтэй тэмцэх төрийн бодлогын хэрэгжилт, үр нөлөө сайжирч, иргэд хууль бус үйлдлийг айдасгүйгээр мэдээлэх, нотлох баримт бүрдүүлэхэд идэвхтэй оролцох нөхцөл бүрдэх юм.