Жүдо бөхийн насанд хүрэгчдийн Азийн аварга шалгаруулах тэмцээн БНХАУ-ын ӨМӨЗО-ы Ордос хотод болж байна.

Тэмцээний эхний өдөр эмэгтэйчүүдийн 48, 52, эрэгтэйчүүдийн 60, 66 кг-ын жингийн медальтнууд тодорлоо.

Манай улсаас эмэгтэйчүүдийн 48 кг-ын жинд олон улсын хэмжээний мастер Ж.Анударь Казахстан, Вьетнам, Энэтхэг, Узбекистаны бөхийг дараалан ялснаар алтан медалиар энгэрээ мялааж, төрийн дууллаа эгшиглүүлэв. Түүний хувьд Монголын эмэгтэй жүдочдоос ААШТ-ий 13 дахь алтан медалийг эх орондоо авчирч байгаа нь энэ. Өдгөө 19 настай тэрбээр тивийн аваргад түрүүлсэн хамгийн залуу жүдоч болж байна.

Харин 52 кг-д “С” хэсгийг тэргүүлэн барилдсан М.Нандин-Эрдэнэ эхний тойрогт хийлж, улмаар Японы Сачи Очиай, Тажикстаны Мадина Курбонзода, шигшээд Узбекистаны Сита Кадамбоева тус тус өвдөг шороодуулснаар манай эмэгтэй жүдочдын 14 дэх алтан медалийг авч, төрийн дууллаа Ордос хотод дахин эгшиглүүллээ.

Тэгвэл эрэгтэйчүүдийн 60 кг-д “Мон-Алтиус Цагаанбаатар” академийн тамирчин Т.Түмэнжаргал эхний тойрогт хийлж, улмаар Хойд Солонгосын Ёонг Нам Риг ялсан ч шөвгийн наймд Тайванийн Ян Юүвэйд ялагдсан. Улмаар дагах барилдаанд Узбекистаны шилдгүүдийн нэг Достон Рузиевыг, хүрлийн төлөө Казахстаны Аман Бакытжаныг буулган авснаар Монголын тамирчдын медалийн салхийг хагалсан юм. Тэрбээр ААШТ-ээс анхны медалиа хүртсэн нь хүрэл болж байна.

Мөн эрэгтэйчүүдийн 66 кг-д барилдсан Ө.Жанцандорж, К.Ёолк нар шагналт VII байрт шалгарав. Эхний өдрийн дараахь байдлаар манай хоёр алт, нэг хүрэл медальтайгаар ААШТ-ийг тэргүүлж байгаа бол Тажикстан алт, мөнгө, хүрэлтэйгээр хоёрт, Бахрейн нэг алттай гуравдугаар байрт жагсаж байна.