Увс нуурын ай савын улсын тусгай хамгаалалттай газар нутгийн Хамгаалалтын захиргаанаас Увс нуурын баруун эрэгт байрлах “Отоглох цэг”-ийн хариуцагчийг сонгон шалгаруулах тендерийг өнөөдөр зарлалаа.
Увс аймгийн Тариалан сумын нутаг, Увс нуурын дархан цаазат газрын Улаангом хэсгийн хязгаарлалтын бүсэд байрладаг “Отоглох цэг”-ийг 2022 онд Байгаль орчин, аялал жуулчлалын яамны санхүүжилтээр байгуулжээ. Тус цэгийн хэвийн үйл ажиллагааг хангах, жуулчдад ээлтэй үйлчилгээ үзүүлэх, байгаль орчныг хамгаалах чиг үүргийг хэрэгжүүлэх хариуцагчийг сонгон шалгаруулах шаардлага үүсээд байгаа юм.
Үүний хүрээнд Увс нуурын дархан цаазат газарт зорчиж буй иргэд, жуулчдад цэвэр, аюулгүй, эрүүл ахуйн шаардлага хангасан орчныг бүрдүүлж, тав тухтай аялах боломжийг бүрдүүлэх юм.
Хариуцагч нь отоглох цэгийг хоёр жилийн хугацаанд ажиллуулахдаа эд хөрөнгийн бүрэн бүтэн байдлыг хамгаалах, шаардлагатай засвар, шинэчлэлийг хийх, үйлчилгээний чанарыг хэвийн түвшинд хадгалах үүргийг хүлээнэ.
