Монголын сагсан бөмбөгийн хөгжлийг дэмжих зорилготой “Хүслийн цом” анхдугаар тэмцээн таван өдөр үргэлжилж, медальтнуудаа “M Bank Arena”-д өчигдөр тодрууллаа.

Улсын хэмжээнд үйл ажиллагаа явуулж буй төрийн өмчийн ерөнхий боловсролын сургуулийн IX-XII ангийн сурагчдаас бүрдсэн эрэгтэй багууд өрсөлдсөн энэхүү тэмцээнд 21 аймаг, есөн дүүргээс шалгарсан шилдэг 32 баг оролцсоноос Хан-Уул дүүргийн 52 дугаар сургуулийн баг түрүүллээ. Тэд шигшээ тоглолтод Баянзүрх дүүргийн 111 дүгээр сургуулийг 93:85-аар буулган авснаар анхны тэмцээний цомын эзэн болов. Тэгвэл мөнгөн медалийг 111 дүгээр сургууль хүртэж, 20 сая төгрөгийн шагнал гардлаа. Финалын тоглолтод Хан-Уул дүүргийн 52 дугаар сургуулийн сурагч Т.Амартүвшин, М.Мөнх-Эрдэнэ, Э.Анхбаяр нар нийлээд 87 оноо авсан нь багаа хожилд хөтөлжээ. Тэгвэл дэд аварга болсон Баянзүрх дүүргийн 111 дүгээр сургуулийн багаас гарааны таван тоглогч 13-аас дээш оноо авч, жигд тоглолт үзүүлсэн байна. Харин хүрэл медалийг Дархан-Уул аймгийн “Од” цогцолбор сургуулийн баг хүртэж 15 сая төгрөг авсан бол тэдэнд хожигдсон Булган аймгийн Хутаг-Өндөр сумын ЕБС-ийн сурагчид дөрөвдүгээрт байрт шалгарснаар 10 сая төгрөгтэй нутаг буцсан юм.

Тэмцээний “Үнэ цэнтэй” тоглогчоор 52 дугаар сургуулийн сурагч М.Мөнхбат тодорсон. Тэрбээр таван тоглолтод 39 оноо, 11.2 самбар, 7.0 оновчтой дамжуулалт дунджилсан байна. Харин “Хүслийн цом”-ын бэлгэдлийн гарааны тоглогчид Булганы Хутаг-Өндөр сумын ЕБС-ийн сургуулийн И.Ариун-Эрдэнэ, 111-р сургуулийн Э.Мөнхсодон, Б.Эрхэс, 52 дугаар сургуулийн Т.Амартүвшин, Дархан-Уул аймгийн “Од” сургуулийн Ц.Сайхансамбуу нар багтжээ. Түүнчлэн тамирчдаа амжилттай оролцсон дасгалжуулагч нарыг 10-25 сая төгрөгөөр шагнасан нь энэхүү тэмцээний гол онцлог байлаа.