АТГ-аас УЕП асан Д.Дорлигжав болон түүний дүү Д.Баатар нарын гэр болон ажлын байранд нь үзлэг, нэгжлэг хийж, Д.Дорлигжавыг саатуулан шалгахаар болсон тухай эх сурвалж мэдээлжээ. 

Н.Алтанхуягийн Засгийн газар огцрохын өмнө Хууль зүйн сайд асан Х.Тэмүүжин 2014 онд УЕП Д.Дорлигжавд “Алтан Дорнод Монгол" компанийн захирал Т.Ганболдоос 4 сая ам.доллар шилжүүлсэн гэх баримтыг олон нийтийн сүлжээнд тавьж байлаа. Тухайн үед Т.Ганболд энэ мэдээллийг нотлоогүй боловч өнгөрөгч сард 25-р суваг телевизэд өгсөн ярилцлагадаа энэ мэдээлэл үнэн гэдгийг хүлээн зөвшөөрсөн. "Д.Дорлигжавын төрсөн Баатарын данс руу энэ мөнгийг шилжүүлсний дараа түүнийг цагдан хорионоос сулласан” гэсэн билээ. Харин Д.Дорлигжав дээрх мэдээллийг үгүйсгэж, "Т.Ганболд миний дүүгийн данс руу дээр мөнгийг санаатайгаар хийсэн. Би түүнийг шалгуулна" гэсэн боловч Т.Ганболдын мэдээллийн мөрөөр АТГ-аас өөрийг нь дуудаж мэдүүлэг авсныг үгүйсгээгүй.

Гэвч өнөөдөр үүссэн нөхцөл байдлаас үзвэл АТГ "Алтан Дорнод Монгол" компани болон УЕП асантай холбоотой 4 сая ам.долларын асуудлаар зүгээр нэг мэдүүлэг аваад өнгөрөөгүй бололтой. Мөн яг одоо 21:00 цагаас Т.Ганболд "Цензургүй яриа" нэвтрүүлэгт оролцоно гэсэн байна.