Монгол Улсын Ерөнхийлөгч Х.Баттулгын санаачилсан Монгол Улсын Их Хурлын чуулганы хуралдааны дэгийн тухай хуульд нэмэлт оруулах хуулийн төслийг Монгол Улсын Ерөнхийлөгчийн Тамгын газрын дарга З.Энхболд Монгол Улсын Их Хурлын дарга М.Энхболдод өргөн барьсан. Энэхүү хуулийн агуулга нь УИХ-ын гишүүдийн олонхи нь санал гаргасан тохиолдолд УИХ-ын даргыг огцруулах асуудлыг хэлэлцэн шийдвэрлэх тухай юм. Энэхүү төсөлтэй холбогдуулан УИХ дахь АН-ын бүлгийн дарга Д.Эрдэнэбат байр сууриа илэрхийллээ.

Д.Эрдэнэбат: "Бүх зүйлийг хуулийн хүрээнд шийдэх ёстой. Хуульгүйгээр хийгдэж байгаа үйлдэл бүхэн төрийн эрхийг хууль бусаар авахтай адил сонсогдож байна. АН-ын хувьд ардчилсан, эрх зүйт төрийг хүндэлж хууль сахих үүргээ биелүүлж хуралд оролцоод явж байгаа. Харамсалтай нь УИХ-ын үйл ажиллагаа олон долоо хоног явсангүй. Төрийн үйл ажиллагаа гацаж байгаа. Үүнээс гарах хоёр л гарц байна гэж бид харж байгаа.

Нэгдүгээрт, УИХ гишүүдийнхээ саналаар өөрөө тарах. Энэ бол ард түмний хүсэн хүлээж буй зүйл мөн болов уу гэж бодож байна. Үүнийг бид ирэх нэг дэх өдөр бүлгийнхээ хурлаар ярилцана.

Хоёр дахь гарц бол яах аргагүй өнөөдөр өргөн барьсан хуулийн гарц. Ерөнхийлөгч болон УИХ-ын гишүүн хууль санаачлах бүрэн эрхтэй. Үүнийг нь УИХ авч хэлэлцэх үүрэгтэй. Тиймээс УИХ-ын дарга хуулийн төслийг Төрийн байгуулалтын байнгын хороонд шилжүүллээ гэж мэдэгдэж байна. Ан-ын бүлэг ирэх долоо хоногт бүлгийнхээ хурлаар энэ төслийг хэлэлцэж шийдвэрээ гаргана. Энэ хуулийг УИХ зайлшгүй хэлэлцэх ёстой юу гэвэл хэлэлцэх ёстой. Энэ хуулийн төсөлд дутагдалтай зүйл байгаа юу гэвэл байгаа. Энэ нь юу вэ гэвэл, УИХ-ны дархлаа суларчих вий гэсэн болгоомжлол байна" гэлээ.