«Паддингтоны адал явдал» киноны найруулагч Пол Кинг алдарт Лабубу тоглоомын дүрд зориулсан бүрэн хэмжээний уран сайхны кино бүтээхээр болсныг The Hollywood Reporter мэдээллээ.

Британийн найруулагч Пол Кинг өмнө нь «Паддингтоны адал явдал» цуврал киног амжилттай найруулсан төдийгүй түүний сүүлийн үеийн бүтээлүүдийн нэг нь жүжигчин Тимоти Шаламе гол дүрд нь тоглосон «Вонка» кино юм.

Sony Pictures кино урлан Лабубугийн тухай кино хийхээр төлөвлөж буй нь сарын өмнөөс ил болсон. Лабубу нь анх уран бүтээлч Касинг Лунг-ийн зохиосон тоглоомын монстрын дүр бөгөөд How2Work компани үйлдвэрлэж байжээ. Харин Хятадын жижиглэн худалдааны Pop Mart компани уг тоглоомыг олноор үйлдвэрлэн худалдаанд гаргаснаар дэлхий даяар алдаршсан юм.

Лабубугийн тухай киноны продюсероор Пол Кингийн хамтаар Department M болон Вэньсинь Шэ компанийн төлөөлөл ажиллах аж. Төсөл одоогоор эхний шатандаа явж байгаа тул киноны үйл явдал, нээлтийн тов зэрэг дэлгэрэнгүй мэдээлэл хараахан зарлагдаагүй байна.