УИХ-ын дэд дарга Л.Энх-Амгалан чуулганы ирц бүрдээгүйтэй холбогдуулан мэдээлэл хийлээ.

Энэ талаар УИХ-ын дэд дарга Л.Энх-Амгалангаас тодруулахад “Үндэсний аюулгүй байдлын асуудлаар Монгол Улсын Ерөнхийлөгч өнгөрсөн долоо хоногт чуулганы хуралдаанд мэдээлэл хийх байсан ч ирц бүрдээгүй. ҮАБЗ-өөс чуулганы ирц бүрдүүлэх тухай албан хүсэлтийг УИХ-ын Тамгын газарт энэ долоо хоногт ирүүлсэн.  Энэ бичгийг хуралдаа ирэхгүй байгаа гишүүдэд ч хүргүүллээ. Өнөө, маргааш хоёр бол он гарахаас өмнө хуралдах ёстой сүүлийн чуулган. Он гарахаас өмнө хуулийн дагуу шийдэх ёстой асуудлууд байна. Жишээ нь, Засгийн газрын гишүүдийг томилох ёстой. Хуулиар бол Засгийн газрын гишүүн огцорсноос хойш 30 хоногийн дотор томилох ёстой. Хүнс хөдөө аж ахуй хөнгөн үйлдвэрийн сайд Б.Батзориг огцроод хоёр сар болж байна. Засгийн газраас асуудлыг өргөн бариад сар гаруй хугацаа болж байгаа. Хугацааны хувьд хууль зөрчиж байна гэсэн үг. УИХ-ын даргаас энэ асуудлыг хууль зөрчиж байна шүү гэдгийг анхааруулж бичиг явуулсан. Чөлөөлж, томилогдож байгаа сайд нарын асуудлыг холбогдох байнгын хорооны хуралдаанаар 7 хоногийн дотор хэлэлцэх ёстой. Гэтэл Ц.Цогзолмааг л хугацаанд нь хэлэлцсэн. Харин Я.Содбаатарыг чөлөөлөх асуудлыг Байнгын хороо хэлэлцэхгүй Дэгийн тухай хууль зөрчиж байгаа.

Ард түмэн төр барих эрхээ 75 гишүүнээр дамжуулж эдэлж байгаа. Тиймээс гишүүд Сүхбаатарын талбайд жагсах биш, УИХ-ын танхимдаа орж ирээд үүсээд байгаа асуудлуудаа шийдэх ёстой. Гишүүн бүрт хууль санаачлах эрх нь бий. 40 гишүүн гэдэг бол ямар ч хуулийг батлах боломжтой кноп. Тиймээс хуулийн дагуу ажиллах ёстой” гэлээ.