УИХ-ын дарга М.Энхболдыг огцрох хүсэлтээ өгөхийг шаардан тэмцэл өрнүүлж буй гишүүд иргэдийг тайван жагсаалд уриалж өчигдөр Төрийн ордонд хэвлэлийн бага хурал хийсэн. Тус хэвлэлийн хурлын үеэр гишүүдийн хэлсэн үгсээс онцолж байна.
УИХ-ын гишүүн Л.Болд:
Монголын ардчиллын сул талыг ашиглан МАНАН дэглэмийг тогтоосон бүлэглэл өмч хөрөнгийг маань эрхшээлдээ оруулж, Монголын төрийг өмчөө хамгаалах тэмцэлдээ ашиглаж байна.
МАНАН дэглэмийн хамгийн өндөр албан тушаал дээр байгаа М.Энхболд Монголын төрийг барьцаалсан өнөөдрийн нөхцөл байдлыг өөрчлөхийн төлөө хуулиар олгогдсон эрхийнхээ хүрээнд жагсан тэмцэцгээе. Монголчууд аа, МОРИНДОO!
УИХ-ын гишүүн Л.Оюун-Эрдэнэ:
Нэг албан тушаалтанд буугаад өгчихдөг ард түмэн гэж байж болохгүй. Илэрхий авлигын хэрэгт буугаад өгчихдөг шударга ёс ч гэж байж болохгүй. Бид энэ удаад “Үгүй” гэж хэлэхгүй бол цаашдаа дахиад “үгүй” гэж хэлж чадахгүй нөхцөл байдал руу орно. Цаашдаа энэ дэглэм бүр хүчтэй болж эхэлнэ. Тийм учраас ордонд байж болох бүх тэмцлийг өрнүүлсэн учраас одоо ард түмэндээ хандаж байна. Олон олон сэхээтнүүд үүнд нэгдээсэй. Олон олон залуучууд маань ирээсэй гэж бодож байна.
УИХ-ын гишүүн Х.Нямбаатар:
Төрийн үйл ажиллагаа зогсоод сар боллоо. Монгол Улсыг 76 тойрогт хувааж, шударга, тэгш ёсны зарчмын дагуу иргэддээ төлөөллийн эрхийг нь Үндсэн хуулиар олгосон юм. Гэтэл Иргэдийн төлөөллийг хангаж буй 40 хүний санал 1 хүний саналыг эрхийг давахгүй байгаад төрийн үйл ажиллагааны үндсэн зарчим зөрчигдөж байна. Нэг хүний суудлын үнэтэй хууль тогтоох дээд байгууллага гэж аль ч улс оронд байхгүй.
Үндсэн хуулийн 2000 оны өөрчлөлтөөр УИХ-ын дарга гэдэг Ерөнхийлөгчийнхөөс илүү бат бөх суудлын эзэд болсон. Тийм учраас үе үеийн намын дарга нар УИХ-ын дарга гэдэг суудал руу үунан дурлаж, хууль тогтоох дээд байгууллага, гүйцэтгэх засаглалын эрх мэдлийг хамтад нь барьдаг тогтолцооны гажиг руу бид орсон. Цаашид зөвхөн спикер гэдэг статусыг хууль тогтоомжийг хүрээнд тогтоох байдлаар бид тэмцэх ёстой.
УИХ-ын гишүүн Т.Аюурсайхан:
УИХ-ын даргад хуулиар олгогдсон хэмжээлшгүй эрх байна. Нэг л саналын эрхтэй, хуулийн дэг сахиулах үүрэгтэй хүн боловч УИХ гэдэг институци мэт эрхтэй болоод байна. Хэн хуулийн төсөл өргөн барьж буйгаас хамаараад хүлээн авах эсэхийг шийддэг, хэлэлцүүлэг явуулах шаардлагатай, сайтад оруулах хэрэгтэй гэдэг. 30-60 хоногийн хугацаа заадаг. Гэтэл зарим хүмүүсийн өргөн барьсан төслийг өнөөдөр хүлээн аваад маргааш хэлэлцүүлэгт оруулах ч эрх мэдэлтэй.
