Өчигдөр УИХ-ын Төрийн байгуулалтын байнгын хороо хуралдаж УИХ-ын дарга М.Энхболдыг огцруулах асуудлыг УИХ-аар хэлэлцэх боломжгүй гэсэн дүгнэлтийг гаргажээ. Учир нь УИХ-ын даргыг хугацаанаас нь өмнө огцруулах хуулийн үндэслэл буюу:

-Өөр ажилд томилогдох болсон

-Өөрийн хүсэлтээр чөлөөлөгдөх хүсэлтээ гаргасан

-Өвчний учир үүрэгт ажлаа хийх боломжгүй болсон талаар эмнэлгийн дүгнэлт гарсан

-Эрүүгийн гэмт хэрэг үйлдсэн нь шүүхээр тогтоогдсон

-Нас барсан гэх таван үндэслэлийн аль нэг нь гараагүй учраас асуудлыг УИХ хэлэлцэх боломжгүй гэв. Гэвч УИХ-ын дарга Үндсэн хууль зөрчсөн асуудлаар МАН-ын дарга У.Хүрэлсүх Үндсэн хуулийн Цэцэд хандаад байгаа. Хэрэв Цэц “Үндсэн хууль зөрчсөн” гэж шийдвэрлэвэл тэр нь УИХ-ын даргыг чөлөөлөх асуудлыг УИХ хэлэлцэх хууль зүйн үндэслэл болж болох юм гэж ТББХ-ны дарга Д.Лүндээжанцан хэлэв.

Харин УИХ-ын гишүүн Ж.Батзандан, Л.Болд, Л.Оюун-Эрдэнэ, Х.Нямбаатар нар эсрэг бодолтой байна. Тэд өчигдөр УИХ-ын даргыг огцруулахаар гарын үсэг зурсан гэх 40 гишүүнийг төлөөлж хэвлэлийн бага хурал хийв. Хэвлэлийн бага хурлаар “УИХ-ын дарга М.Энхболд 48 цагийн дотор өөрийн хүсэлтээр чөлөөлөгдөх хүсэлтээ өгөхгүй бол хотын төв талбайд бүх нийтийн жагсаал цуглаан зохион байгуулна” гэв.

Өөрөөр хэлбэл, тэд УИХ-ын даргыг огцруулах асуудлыг хууль ёсны болгохын тулд өөрөөр нь өргөдлийг өгүүлэхээр шахаж байна л даа. Өнгөрөгч сард Ерөнхий сайд У.Хүрэлсүх Нийслэлийн Засаг дарга С.Батболдыг огцруулах бичгийг НИТХ шидсээр байгаад С.Батболдоор өөрөөр нь өргөдлийг өгүүлж чадсан. Үүнтэй адил үр дүнг хүлээж байх шиг.

Хачирхалтай нь ЖДҮХС-нийн зээлийн асуудал УИХ дээр босч ирсний дараа Ерөнхий сайд У.Хүрэлсүхийн тавьсан хотын даргыг огцруулах шаардлагад “Улаанбаатарын утааг арилгасангүй” гэдэг үндэслэл байдаг юм. Түүний оронд Засаг даргаар очих хүн Улаанбаатарыг утаанаас салгахын тулд очиж байгаа шүү гэдгээ эртнээс ухамсарлаж байвал зохино.

УИХ-ын даргын хувьд ч мөн ялгаагүй. 2016 оны сонгуулийн өмнө хийсэн 60 тэрбумын хэлцэл 2018 онд УИХ дээр босч ирсэн ЖДҮХС-гийн зээлийн асуудлаас болж УИХ-ын даргын сандал суудалд халгаатай болсон нь бас л гайхалтай. Энэ хоёр нэг юмаа гэж үзвэл ядаж зээл авсан, өгсөн нөхөд нь эхлээд шийтгүүлсэн байх ёстой баймаар.

Хоёрт, хэрвээ УИХ-ын 40 (36 нь МАН) гишүүн 60 тэрбумын асуудал эрүүгийн гэмт хэрэг мөн хэмээн үзэж шударга ёсыг тогтоохын төлөө байсан бол 2017 оны сонгуульд өрсөлдөж байхад нь шууд нэрийг татуулаад өөр хүн нэр дэвшүүлэх боломж байлаа. Тэгсэн бол өнөөдөр ийм нөхцөл байдал үүсэхгүй байсан нь лав. Ядаж сонгуульд ялагдаад буцаж ирэхэд нь шууд дээлийг нь тайлуулчихгүй яасан бэ гэдэг асуулт гарна. Тэгэхээр үүний гаргалгаа нь “асуудал шударга, шударга бусдаа биш байна аа” л гэсэн үг.

Ц.Нямдорж сайдын намынхаа Бага хурал дээр хэлсэн үг бий шүү ээ. “УИХ-ын 20 гаруй гишүүн ЖДҮХС-ийн зээлтэй холлбогдчихоод байхад ЖДҮ-тэй тэмцэнэ гээд юу яриад байгаа юм бэ. УИХ-ынхаа гишүүдтэйгээ тэмцдэг УИХ-ын дарга гэж хаана байсан юм бэ” гэж. Бас л муухай цагаандаа гарч байгаа юм шүү. Намайг хэн хэлэх юэ, нохойг хэн саах вэ л болж байна л даа. Хорин хэдэн хүний бүрэн эрхтэй ноцолдож байхаар УИХ-ын нэг даргатай хариуцлага тооцчихвол энэ УИХ бүрэн бүтэн үлдчих гээд байгаа юм аа даа. Наагуур харахад. (Сонгогдсон 65 гишүүнийх нь 1/3 нь хулгайч болчихоор МАН 2020 оны сонгуульд иргэдийн өмнө ямар нүүрээрээ очих вэ)

Гэвч УИХ-ын дарга М.Энхболд өргөдлөө өгөхгүй, УИХ-ын 40 гишүүн М.Энхболдыг огцрортол УИХ-ын чуулганд суухгүй гэсэн энэ хэвээр байвал УИХ тарахаас өөр аргагүй болж байна. Энэ бол УИХ үйл ажиллагаа явуулах бүрэн чадамжгүй болсны илрэл гэж УИХ-ын гишүүн, Эрчим хүчний сайд Ц.Даваасүрэн хэлэв. Хэрвээ УИХ өөрөө тарах шийдвэр гаргавал УИХ-ын ээлжит сонгууль хугацаанаасаа нэг жилийн өмнө болж, дараачийн УИХ-ыг бүрдтэл одоогийн парламент бүрэн эрхээ хэрэгжүүлнэ.   

Б.ЗАЯА