Хятадын Menpad компани үндэсний үйлдвэрлэгчээ дэмжиж эхэлжээ. Huawei гар утсыг авсан ажилчидаа Menpad-ын удирдлага урамшуулан шагнаж, харин Apple авсан хүмүүсийг торгож байхаар болсон байна. 

Канадад Huawei компанийн топ-менежер Мэн Ваньжоу баривчлагдсаны дараа ийм шийдвэрийг үйлдвэрлэгч гаргажээ. "Тийм ээ, ийм байгаа, удирдлага ийм шийдвэр гаргасан гэж Хятадын өмнөд Гуандун мужийн Шэньжэнь хотод байрладаг компани уг мэдээллийг баталлаа. 

Menpad өөрийн бүтээгдэхүүний үйлдвэрлэлд Huawei компанийн чипыг ашиглах ба Huawei ба ZTE гар утаснууд худалдан авсан ажилчиддаа төхөөрөмжийн зах зээлийн үнийн 15 хувийг нь нөхөн олгож байхаар шийджээ. Харин Apple гар утсыг худалдан авсан ажилтнуудаа түүний зах зээлийн үнэтэй тэнцэх 100 хувийн торгууль ноогдуулж шийтгэх гэнэ.

Үүний зэрэгцээ компани америкийн үйлдвэрийн тоног төхөөрөмж, авто худалдан авахаа бүрэн зогсоож, хэрэв компанийн ажилтан америк компаниас экспортын захиалга авч чадвал түүнийг хоёр дахин цалингаар шагнах гэнэ. 

Huawei компанийг үндэслэгч Жэнь Чэнфэйн охин Хуэвэй компанийн санхүүгийн захирал Мэн Ваньжоуг Канадын Ванкувер хотноо АНУ-ын хүсэлтээр араванхоёрдугаар сарын 1-нд цагдаагийнхан баривчилсан. Ираны эсрэг Америкийн хориг арга хэмжээг Мэн зөрчсөн гэж АНУ үзэж байгаа аж.

Huawei бол харилцаа холбооны тоног төхөөрөмжийн нийлүүлэлтээр Дэлхийд нэгт бичигддэг, ухаалаг гар утасны борлуулалтаар хоёрт бичигддэг том компани.

Өнгөрсөн долоо хоногт АНУ-ын ерөнхийлөгч Дональд Трамп уг хэргийн талаар хэвлэлд ярихдаа “хэрвээ үндэсний эрх ашигт нийцэх, Хятадтай хийх худалдаанд сайнаар нөлөөлөхөөр” бол Мэн Ванжоуг суллуулах талаар шийдвэр гаргагчдад нөлөөлж чадна гэжээ.

Канад дахь Хятадын Элчин сайдын яам уг баривчилгааг хүнийг эрхийг бүдүүлэгээр зөрчсөн хэрэг гээд Мэнийг нэн даруй суллахыг шаардсан юм.

М.Цогт