“Боловсрол” телевиз, Үндэсний тавилга үйлдвэрлэгч “Kitchen all” компани хамтран “Гал тогоо” шоу нэвтрүүлгийг бэлтгэн хүргэж эхэлснээс хойш нийт 40 сая төгрөгийн иж бүрэн гал тогоог дөрвөн айлд бэлэглэсэн байна. Шоуны тав дахь дугаарын супер ялагч болсон хуульч Х.Тэмүүжин ялагчийн эрхийн дагуу Германы Hansa брэндийн цахилгаан бараагаар тоноглогдсон Kitchen all брэндийн иж бүрэн тавилга бүхий гал тогоог эздэд нь бэлэглэлээ.

Шоуны ялагч Kitchen all брэндийн facebook хуудсанд ирүүлсэн гал тогоотой болох 200 гаруй хүсэлтээс “Ээлтэй ертөнц” ТББ-ыг сонгожээ. “Ээлтэй ертөнц” ТББ-ыг онцгой асаргаа хэрэгтэй буюу тархины саажилттай хүүхэдтэй эцэг эхчүүд хамтран байгуулсан байна. Тус байгууллага нь өнгөрсөн есдүгээр сараас “Энэрэл” хүүхэд хөгжлийн төвийн үйл ажиллагааг эхлүүлж, хөгжлийн бэрхшээлтэй хүүхэдтэй эцэг эхчүүд “Ханни” нэртэй зөөлөн тоглоомыг үйлдвэрлэж байна.

"Энэрэл" хүүхэд хөгжлийн төвд онцгой асаргаа хэрэгтэй 12 хүүхэд болон асран хамгаалагч, багш ажилчид нийлсэн 30 гаруй хүний өглөө, өдөр, оройн хоолыг гал тогоондоо бэлтгэх шаардлага гардаг аж. Тавилгагүй, ганц ширэмтэй плитка дээр хоолоо хийдэг байсан "Энэрэл" хүүхэд хөгжлийн төвийн хүүхдүүдэд "Гал тогоо" шоу нэвтрүүлгийн ялагч Х.Тэмүүжин иж бүрэн гал тогоо бэлэглэлээ.