Өчигдөр шөнө МАН-ын Бага хурал шийдвэрээ гаргажээ. Хурлаас гаргасан шийдвэрийг танилцуулах хэвлэлийн бага хурлыг өнөөдөр 12:00 цагт зарласан юм. Харин сэтгүүлчид мэдээллийг дамжуулахгүй гэдгээ илэрхийлсэн. Тэд өчигдөр болсон МАН-ын Бага хуралд хэвлэлийнхнийг оруулаагүй, гадаа хүйтэнд зогсоосонд ийнхүү дургүйцлээ илэрхийлэв. 

Үүний дараа Монгол Ардын Намын байгуулалтын газрын дарга Б.Баярбаатар өрөөндөө мэдээлэл хийлээ. 

Б.Баярбаатар "МАН-ын Бага хурлаар 70 орчим гишүүн асуулт асууж, санал хэлсэн. МАН бол хамтын шийдвэр гаргадаг нам. Намын дарга өөрийн эрхийн хүрээнд УИХ-ын даргыг хүсэлтээрээ чөлөөлөгдөхийг хүссэн. Үүнийг нь Бага хурлаар дэмжих эсэхийг хэлэлцсэн. Намын эв нэгдэл чухал. МАН-ын дарга ч мөн эв нэгдэл бол бидний үнэт зүйл гэж хэлдэг. Гэхдээ энэ нь шударга ёсонд тулгуурласан эв нэгдэл байх ёстой. Тиймээс шударга ёс нэгдүгээрт байна гэсэн үг.

Аливаа улстөрийн нам нийгмийн сэтгэл зүй дээр тулгуурлан хамтын шийдвэрээ гаргаж байх ёстой. Өчигдөрийн МАН-ын Бага хурлаар Удирдах зөвлөлийн гишүүдийн бүрэлдэхүүндээ өөрчлөлт оруулж Д.Хаянхярваа, Су.Батболд нарын 11 гишүүнийг чөлөөлж, Д.Сумъяабазар, С.Амарсайхан нарын орных нь хүнийг томилсон. Нийслэлд нэг квот сул байсан тул хүн томилсон. Үүнийг холбогдох хууль, намын дүрмийн дагуу шийдвэрлэсэн.

Бага хурлаар дотооддоо болох, болохгүйгээ илэн далангүй ярьсан үр дүнтэй хурал болсон" гэв.

Мөн МАН-ын Бага хурлаас гаргасан тогтоолд "Нэгдүгээрт, 60 тэрбум, ЖДҮХС-тай холбоотой асуудлыг холбогдох хууль хяналтын байгууллагад шалгуулах нь зүйтэй, Хоёрдугаарт, Авлига, хууль зөрчсөн үйлдэлтэй хатуу тэмцэж, шударга ёсыг тогтооно" хэмээн танилцууллаа.