Хятад улс хөгжлийн өнөөгийн түвшинд өөрийн ард түмний сүүлийн 40 жилийн гайхамшигт хөдөлмөрийн үр дүнд хүрлээ гэж БНХАУ-ын дарга Си Жиньпин мэдэгдсэн байна. Тэрбээр эдийн засгийн энэ амжилт “тэнгэрээс унаад ирээгүй” гээд хөгжингүй зарим орны хувьд хэдэн зуун жил шаардаж байсан үйлдвэржүүлэлтийн үеийг Хятад улс энэ 40 жилд  амжууллаа гэжээ. “Энэ бол манай нам, олон үндэстний  ард түмний хөдөлмөрч, дайчин, шаргуу хөдөлмөрийн үр дүн” гэж Си Жиньпин Өөрчлөлт, ил тод байдлын 40 жилийн ойд зориулан хэлсэн үгэндээ тэмдэглэсэн байна.

БНХАУ-ын тэргүүн хятадын ард түмний амьдралыг янз бүрийн хүрээнд өөрчлөх, улс төрийн ил тод байдлыг сайжруулж, “намын сахилга батыг бэхжүүлснээр улс орны удирдлага авлигын гэмт хэрэгт “шийдвэртэй яллаа” гэснийг “Интерфакс” иш татжээ.

Зөвхөн өнгөрсөн таван жилд төрийн захиргааны янз бүрийн шатны 125 мянган албан тушаалтанд намын сахилга бат зөрчсөн хийгээд авлигын хэргийн төлөө шийтгэл ногдуулсан гэж өнгөрсөн аравдугаар сард мэдээлж байсан юм.

“Бид намын дотоод сахилга батыг хатуу сахиж, хэлбэрдэх, хүн суртал гаргах, үрэлгэн явдал, тансаглал, авлигын гэмт хэрэгтэй бүхий л хүчээрээ тэмцэх болно” гэж Си Зиньпин хэлсэн байна.

Энэ өдрүүдэд Хятадад улс төрийн шинэчлэл, нээлттэй байдлын 40 жилийн ойг тэмдэглэж байна. Энд газар тариалангийн хамгийн ядуу орныг харьцангуй богино хугацаанд дэлхийд хоёрт орох асар том эдийн засагтай орон болгосноо онцлон тэмдэглэж байна.

БНХАУ-ын дарга Си Жиньпин хятадын онцлогтой социализм байгуулахад асар их амжилт олсноо 40 жилийн ойд зориулж Буужин хот дахь Ардын хурлын ордонд хийсэн  цуглаан дээр онцлон тэмдэглэлээ гэж “Жэньминь жибао” сонин нийтэлжээ.

Хятадын эдийн засгийн шинэчлэл нь Дэн Сяопины үед 1978 оноос эхэлсэн юм. Энэ шинэчлэлийг “хятадын онцлог”-ийг хадгалсан зах зээлийн эдийн засагт шилжүүлэх гэсэн нэрийн дор эхлүүлжээ.