Чансааны эхэнд Германы канцлер Ангела Меркель дахин бичигдэв. Хоёрдугаарт Британийн Ерөнхий сайд Терека Мэй хоёр дахиа бичигджээ. Харин гуравт ОУВС-гийн захирал Кристин Лагард гарч ирэв. Жилийн өмнө тэнд бичигдэж байсан Microsoft компанийг үндэслэгч Билл Гейтсын эхнэр Мелинда энэ удаа зургаад оржээ.

Дөрөв ба тавд General Motors компанийн гүйцэтгэх захирал Мэри Барра ба Fidelity Investments хөрөнгө оруулалтын компанийн тэргүүн Эбигейл Жонсон нар бичигдлээ. Долоод, YouTube компанийн захирал Сьюзан Войжицки, дараалаад Анна Патрисия Ботин (Испанийн Banсo Santander банкны тэргүүн) нэрлэгдэж, нисэхийн Lockheed Martin компанийн тэргүүн Мэрилин Хьюсон, IBM компанийг толгойлогч Жинни Рометти нар чансааны эхний арвыг төгсгөлөө.

Оросоос чансаанд багтсан цорын ганц эмэгтэй Оросын Төв банкны ерөнхийлөгч Эльвира Набиуллина жилийн өмнөх шигээ л 49-р байраа хадгалжээ.

Их Британийн хатан хаан II Елизавета 23-рт, АНУ-ын Ерөнхийлөгчийн охин Иванка Трамп 24-рт, Хорватын  Ерөнхийлөгч Колинда Грабар-Китарович 47-рт тус тус нэрлэгджээ.

Дэлхийн нөлөө бүхий 100 эмэгтэйн чансаанд 20 эмэгтэй шинээр орж ирсний дунд агаарын теннисчин Серена Уильямс (79), продюсер, “Тачаалын анатоми” телевизийн олон ангит киног бүтээгч Шонда Раймс (74), Нью-Йоркийн хөрөнгийн биржийн тэргүүн Стейси Каннингем (27) нар байв.

Жилийн дотор чансааг орхигчдын дунд АНУ-ын Төрийн нарийн бичгийн дарга асан Хиллари Клинтон байв. Тэрбээр 2016 онд чансааны хоёрт байгаад дараагийн жилд нь сонгуульд ялагдан 64 байр хүртэл ухарсан байгаад энэ  жил хоосон үлджээ. Мөн чансаанаас НҮБ-д суугаа АНУ-ын Байнгын төлөөлөгчдийн байраа энэ сард орхих Никки Хейли, энэ жилд Мьянмарын рохинжа нарын хоморголон устгалтай холбоотойгоор шүүмжлүүлж байсан Ан Сан Сучи нар хасагдлаа.

М.Цогт