The Guardian сонины мэдээлснээр, залуучуудын дунд шарлага болон наранд бие шарах сонирхол эрс нэмэгдэж, энэ нь аюултай тренд болон хувирч байна. TikTok, Instagram зэрэг олон нийтийн сүлжээнд “шарлага” гэсэн сэдвийн бичлэг, зургууд олноор нийтлэгдэж байгаа бөгөөд Melanoma Focus гэх буяны байгууллагын өнгөрсөн онд хийсэн судалгаагаар Их Британийн насанд хүрэгчдийн 28 хувь нь наранд бие шарах дуртай бол 18-25 насны залуусын хувьд энэ тоо 45 хувьд хүрсэн байна.

Шинэ үеийнхэн арьсаа илүү борлуулахын тулд юу ч хийхээс буцахгүй болжээ. Зарим нь арьсан дахь мелатонины хэмжээг нэмэгдүүлэх зорилгоор тусгай нэмэлттэй тос, бүтээгдэхүүн ашиглаж, нөгөө хэсэг нь хэт ягаан туяаны индекс хамгийн өндөр үед зориуд наранд гарах болсон байна. Хачирхалтай нь, тэд хэт их наранд шарах нь арьсны хорт хавдар үүсгэдгийг сайн мэддэг ч, борлосон арьсыг эрүүл, сайхан харагдах шинж гэж үзсээр байна.

Их Британийн Эрүүл мэндийн үндэсний алба аюулгүй бөгөөд ашиг тустай шарлага гэж үгүйг онцолж, 11:00-15:00 цагийн хооронд нарны туяанаас зайлсхийх, гадаа гарах тохиолдолд нарны шил зүүх, нарнаас хамгаалах тос хэрэглэхийг зөвлөсөн. Дэлхийн эрүүл мэндийн байгууллага шарлагыг “аюултай” гэж ангилж, гоо сайхны зориулалтаар нарыг ашиглах нь нас богиносгож, арьсны хорт хавдрын эрсдэлийг нэмэгдүүлдэгийг анхааруулжээ. Судалгаагаар шарлагын үйлчилгээ нэг удаа авсан хүний меланома тусах эрсдэл, огт орж үзээгүй хүнийхээс 20 хувиар өндөр байдаг байна.

Мэдээлэлд дурдсанаар, 23 настай Эмили гэх эмэгтэй эцэг эх нь эрүүл мэндийн салбарт ажилладаг учраас наранд шарах эрсдэлийн талаар сайн мэддэг ч, өсвөр насныхаа ихэнхийг цар тахал, дайн, уур амьсгалын өөрчлөлтийн үеэр өнгөрөөсөн тул шарлагын аюул нь өөрт нь бага эрсдэлтэй мэт санагддаг гэж хэлсэн байна. “Юунаас ч үхэл ирнэ” хэмээн тэр ярьжээ.

Мөн 29 настай бүжгийн багш “Дөнгөж амралтаас ирсэн юм шиг харагдахын тулд” шарлага авдгаа хэлсэн байна. ДЭМБ шарлагын газруудыг хаахыг тууштай санал болгодог бөгөөд Австрали улсад арилжааны шарлагын үйлчилгээ 10 жилийн өмнөөс, харин Бразильд 2009 оноос хориглогджээ.

Ерөнхийдөө шарлагын өгч буй “хурдан үр дүн” нь залуусын дунд хүчтэй нөлөө үзүүлж байгаа бөгөөд энэ нь олон нийтийн сүлжээнд нийтлэгдсэн засварласан биеийн зургуудыг даган дуурайх үзэгдэлтэй салшгүй холбоотой байна.

Эх сурвалж: The Guardian, Office Life