Өнгөрөгч баасан гаригаас хойш УИХ-ын нэгдсэн чуулган хуралдаж чадахгүй нөхцөл байдал үүсээд байна. Энэ нь Үндсэн хууль зөрчиж байгаа тухай хуульч Б.Ариунболд мэдээлэл хийлээ.

Хуульч Б.Ариунболд:

-Үндсэн хуулийн цэц УИХ гишүүд болон төрийн өндөр албан тушаалтан Үндсэн хууль зөрчсөн эсэх нь тогтоогдвол эгүүлэн татах хариуцлага ногдуулан ажиллах үүрэгтэй байдаг. Тийм ч учраас чуулганд ирэхгүй байгаа зарим УИХ-ын гишүүн Үндсэн хууль зөрчиж буй талаар хуулийн зохицуулалтыг та бүхэнд танилцуулж байна.

Үндсэн хуулийн 25.4-т “Улсын Их Хурлын бусад бүрэн эрх, зохион байгуулалт, үйл ажиллагааны журмыг хуулиар тогтооно" гэсний дагуу УИХ-ын чуулганы хуралдааны журам нь Дэгийн тухай хуулиар зохицуулагдаж байна. Дэгийн тухай хуулийн 4.10-т "Монгол Улсын Үндсэн хуулийн тодорхой заалтыг илтэд зөрчсөн асуудал хэлэлцсэн, эсхүл Монгол Улсын Үндсэн хуульд нэмэлт, өөрчлөлт оруулахыг эсэргүүцэхээс бусад шалтгаанаар гишүүн... хуралдаанд оролцохгүй байх...-ыг хориглоно" гэж заасан байдаг.

Гэтэл одоогоор 40 орчим гишүүн УИХ-ын даргыг огцрохоос нааш чуулганы хуралдаанд оролцохгүй хэмээн мэдэгдэж, УИХ-ын аливаа үйл ажиллагаанд оролцохоос татгалзаад байна. Үүний улмаас төрийн эрх барих дээд байгууллагын үйл ажиллагаа зогсонги байдалд орууллаа.

УИХ-ын гишүүд тангарагаасаа няцан Үндсэн хууль, Дэгийн тухай хууль, УИХ-ын тухай хуулийг зохион байгуулалттайгаар зөрчиж байна. Төрийн албыг 60 тэрбумаар арилжсан асуудал гаргасан гэх УИХ-ын даргыг огцруулах, чөлөөлөх асуудлыг Үндсэн хуулийн хүрээнд шийдвэрлэх нь эрх зүйт төрийн зарчимд нийцнэ гэв.