Өглөө 10.00 цагаас эхлэх ёстой байсан УИХ-ын нэгдсэн чуулган ирц бүрдээгүйн улмаас хуралдаж чадсангүй.

УИХ-ын чуулганы нэгдсэн хуралдаанаар өнөөдөр Засгийн газрын гишүүнийг томилох, чөлөөлөх, ЖДҮХСантай холбоотой асуудал, Төрийн албаны тухай хуулийн шинэчилсэн найруулга 2019 оны нэгдүгээр сарын 1-нээс хэрэгжиж эхлэхтэй холбогдуулан Төрийн албаны зөвлөлийн бүрэлдэхүүнийг томилох зэрэг асуудлыг хэлэлцэх ёстой байсан ч Засгийн газрын гишүүд хуралдааныг хийлгэсэнгүй.

Сайд нар чуулганы танхимд орж ирсэн ч картаа хийхгүй байсан тул гишүүдийн ирц 49.3 хувьтай, чуулган хуралдах боломжгүй байгааг УИХ-ын дарга хэлээд хуарлдааныг маргааш өглөө 10 цагаас зарлалаа.

Сануулахад Засгийн газрын тэргүүн, Ерөнхий сайд У.Хүрэлсүх өчигдөр өглөө Япон Улсад айлчлал хийхээр мордсон. Тэгэхээр түүнийг айлчлалаас ирэх хүртэл сайд нар хуралдаанд суухгүй нь тодорхой болов. Мөн чуулганы ирц бүрдэхгүй байна гэдэг шалтгаанаар УИХ-ын зарим гишүүд гадагшаа нисч эхэлсэн байна. Өнгөрөгч баасан гаригийн чуулган ч бас мөн ийм шалтгаанаар хойшилсон билээ. Засгийн газрын гишүүд “УИХ-ын дарга М.Энхболд албан тушаалаасаа сайн дураараа огцрох өргөдлөө өгтөл чуулганд суухгүй” гэж мэдэгдсэн.

Б.ЗАЯА