Нийслэлийн авто зогсоолын хүртээмжийг нэмэгдүүлэх ажлын хүрээнд Нийслэлийн Ерөнхий архитектор Ч.Төгсдэлгэр болон холбогдох албаныхан Баянгол дүүргийн 5, 6 дугаар хороонд ажиллаж, “10 дугаар хороолол”-ын авто зогсоолын нөхцөл байдалтай газар дээр нь танилцлаа.

Тус бүсэд “on street” буюу зам дагуу авто зогсоол шинээр байгуулах зураг төсөл боловсруулсан бөгөөд одоогоор 10-р хорооллын замын урд хэсэг нь том талбайтай ч зохион байгуулалт муутай, эмх цэгцгүй зогсоолын байдалтай байгааг Ерөнхий архитектор онцолсон юм. Үүнтэй холбогдуулан зураг төсөлд бага хэмжээний өөрчлөлт оруулж, явган хүний зам, дугуйн зам, ногоон байгууламж нэмж тусган, тухайн гудамжийг иж бүрэн хэлбэрээр тохижуулахаар төлөвлөжээ.

Баянгол дүүргийн Засаг дарга Ө.Сумъяабаатарын хэлснээр, 10-р хороолол орчмын энэхүү бүс нь нийт таван хороог хамарч, 40-50 мянган хүн амтай тул хотын ачаалал өндөртэй бүсд тооцогддог аж. Иймд ойролцоогоор 1–2 км орчим зам дагуу ил зогсоол байгуулснаар тухайн орчны авто машины зогсоолын асуудлыг тодорхой хэмжээнд шийдэх боломжтой гэж үзэж байна.

Мөн уг бүсэд дулааны шугам, худаг зэрэг инженерийн дэд бүтэц байрлаж байгаа учраас бүтнээр нь асфальтаар хучихгүй, зарим хэсгийг ногоон байгууламж болгон тохижуулах шийдэлд хүрээд байна. Энэ нь орчны агаар, замын ачаалал, хөдөлгөөний зохион байгуулалтад бодит өөрчлөлт авчрах зорилготой гэж албаны хүмүүс мэдэгдэв.

Эх сурвалж: Нийслэлийн Ерөнхий архитектор, Баянгол дүүргийн ЗДТГ