Монгол Улсын Засгийн газар, Батлан хамгаалах яам, Боловсрол, шинжлэх ухааны яам хамтран хэрэгжүүлж буй “Оюутан цэрэг–2025” хөтөлбөрийн хүрээнд ҮБХИС-ийн Шар хад хээрийн сургалтын төвд суралцаж буй оюутан цэргүүдийн 5 км марш тактикийн бэлтгэл амжилттай зохион байгуулагдлаа.

Энэхүү марш нь оюутан цэргүүдийн:

• Бие бялдар, тэсвэр хатуужил

• Сэтгэл зүй, багаар ажиллах чадвар

• Цэргийн зохион байгуулалт, сахилга дэг журам

• Анхан шатны цэргийн бэлтгэл
  зэргийг хөгжүүлэх зорилготойгоор хөтөлбөрт тусгагдсан үндсэн сургалтын нэг хэсэг юм.

Маршийн үеэр рот, салааны захирагч нар оюутан цэргүүдийг замын турш удирдан чиглүүлж, дэс дараатай, зохион байгуулалт сайтайгаар бүрэн бүрэлдэхүүнээрээ зорьсон цэгт хүрсэн нь хээрийн сургалтын үр дүн өндөр байгааг харууллаа.

“Оюутан цэрэг” хөтөлбөр нь залуусыг эх оронч үзэл, сахилга баттай иргэн болгон төлөвшүүлэх, цэргийн мэдлэг, чадвартай болгож бэлтгэх чухал ач холбогдолтой үндэсний хэмжээний цогц сургалт бөгөөд энэхүү марш нь тэдний бие, сэтгэл зүй, хамт олны уур амьсгалыг бэхжүүлэх чухал алхам болж байна.

Эх сурвалж: Батлан хамгаалах яам, ҮБХИС.