NASA-гийн “InSight” судалгааны станц дэлхийгээс хөөрснөөс хойш долоон сарын дараа арваннэгдүгээр сарын 26-ны өдөр Ангараг гариг дээр амжилттай газардсан билээ. Тэгвэл өчигдөр буюу мягмар гаригт тус гариг дээр авсан селфи зургаа дэлхийд үзүүлжээ.

Селфи зургийг нийт 11 хэсэгчилж авсан зурагнаас эвлүүлж бүтээсэн байна. Селфи дээр InSight станцын эх бие, багаж төхөөрөмжүүд, нарны эрчим хүч хүлээн авагч хавтан, цаг уур хэмжигч шон гээд бүгд гарсан байна.

Ангараг гаригийн дотоод бүтцийг судлах зорилготой уг станц одоо ажиллахад тохиромжтой чулуугүй газар байрлахаар хайж байгаа аж. Чулуугүй сул хөрстэй газар олсны дараа өрөмдлөг хийж, багаж төхөөрөмжүүдээ зоож байрлуулах гэнэ. Өрөмдлөгийн гүн 5 метр орчим байна.

Америкийн үндэсний сансар судлалын хүрээлэн NASA энэ төсөлд нийт $830 саяыг зарцуулжээ.

“Insight” станцаас өмнө хамгийн сүүлд зургаан жилийн өмнө “Curiosity” нэртэй өөрөө явагч станцыг улаан гаригт буулгаж байв. Ялгаатай нь “Insight” станц Ангарагийн хөрсөн дээр “Curiosity” шиг  тэнүүчлэхгүй, суурин нөхцөлд ажиллах юм. “Insight” станцыг Ангараг руу илгээхэд Герман болон Францын сансар судлалын агентлагууд хамтран ажиллажээ.

Б.Туяа