БНХАУ-ын Өвөр Монголын Улаан хад хотын Онниуд хошуунд орших Хаш лууны элсэн нуурын аялал жуулчлалын бүс нь байгаль орчны нөхөн сэргээлт болон соёлын өвийг хослуулсан шинэ загварын аялал жуулчлалыг амжилттай хөгжүүлж буй жишээ болж байна. Шар мөрөн болон Нигун голын уулзвар, Хорчины элсний баруун хэсэгт байрлах энэ бүс нутгийн 40 гаруй хувь нь хуурай, гандуу уур амьсгалтай, элсэрхэг хөрстэй байсан ч Хятадын Засгийн газрын ногооруулах бодлогын хүрээнд 100 гаруй км үргэлжилсэн элсэн цөлд мод тарих, ургамалжуулах ажлыг эрчимтэй хийснээр экосистемийн тэнцвэрийг тодорхой хэмжээнд сэргээж чаджээ.

Энэ бүс нутгийг аялал жуулчлалын соёлын бүс болгон хөгжүүлэх санаа нь зөвхөн байгаль хамгаалал төдийгүй Хунь Шань соёл гэх эртний түүхэн өв дээр суурилжээ. Тухайн газраас 1971 онд Хятадын анхны хаш лууны дурсгалт олдвор олдсон нь түүхийн үнэ цэнтэй олдворын эхлэл болж, өдгөө Бээжингийн Улсын музейд хадгалагдаж байна. Хаш луу нь 5–6 мянган жилийн өмнөх Хунь Шань соёлын биет илрэл бөгөөд тухайн цаг үеийн хүмүүсийн амьдралын хэв маяг, байгальтай харьцах үзэл, сүсэг бишрэлийн дүр төрхийг харуулдаг. Эртний хүмүүс байгалийн хүчийг хүндэтгэж, тариалан эрхэлж, ваар урлаж, дотоод сэтгэлээ урлагийн хэлээр илэрхийлдэг байсныг энэхүү соёлын дурсгалууд бататгаж өгдөг.

Хаш лууны элсэн нуурын аялал жуулчлалын онцлог нь зөвхөн байгалийн үзэмж бус, соёлын өвийг бүтээлч аргаар харуулдагт оршино. Бүс нутаг даяар лууны дүрст дурсгалуудыг сүндэрлүүлэн байрлуулж, түүхэн домог, үлгэрийн уур амьсгалыг сэргээж, жуулчдад зориулсан бэлэг дурсгалын бүтээгдэхүүн, эртний домогт суурилсан үйл ажиллагаанууд өрнүүлдэг. “Лууны дүрийг үзсэн хүн амжилттай, азтай байдаг” гэх уламжлалт домгийг аялал жуулчлалын брэнд болгож, түүгээр дамжуулан соёлын гүн гүнзгий санааг эдийн засгийн урсгал болгох бодлого хэрэгжиж байна.

Жуулчид тус бүс нутгийн дурсгалт газруудаар аялж, Хунь Шань соёлын бодит үзмэр болон виртуал музейн тусламжтайгаар үзсэн зүйлээ баталгаажуулж, илүү гүнзгий ойлголт авдаг. Мөн байгалийн сайхан хосолсон ой мод, загас жараахайгаар дүүрэн жижиг нуур, үзэмжит уул толгодын дунд сэтгэл сэргээгч орчныг мэдрэх боломжтой.

Нуурын эрэг дээрх “Сэтгэл зүрхээ Хаш луу нуурын зүрхэнд үлдээгээрэй” хэмээн сийлсэн үгс нь эртний домгийн уламжлалыг орчин цагийн аяллын сэтгэл зүйтэй хослуулж, зочдын сэтгэлд гүн уярал үлдээдэг. Түүнчлэн аялал жуулчлалын бүс орчмоор тохилог чингэлэг сууц, түр баазууд байгуулсан бөгөөд оргил үедээ өдөрт 50 мянга гаруй жуулчин хүлээн авах хүчин чадалтай.

Энд мөн тэмээ унах, арга хэмжээнд оролцох, бэлэг дурсгалын худалдаа хийх зэргээр орон нутгийн иргэд орлоготой болж, соёлын аялал жуулчлалын тогтвортой өсөлтийг дэмжин, жил бүр шинэ бүтээн байгуулалт өрнүүлсээр байна. Байгалийн баялаг, соёлын өв, орчин үеийн маркетингийг хослуулсан Хаш лууны элсэн нуур бол аялал жуулчлалын ирээдүйг хэрхэн урлаг, байгаль, эдийн засагтай уялдуулах жишиг загвар болж байна.

Эх сурвалж: ӨМӨЗО-ын аялал жуулчлалын хэвлэл.