2025–2026 оны хичээлийн жил эхлэхээс өмнө нийслэлийн удирдлага сургууль, цэцэрлэгийн хүртээмжийг нэмэгдүүлэх зорилгоор хувийн хэвшлийн зориулалттай барилга байгууламжийг санхүүгийн түрээсийн гэрээгээр төрийн өмчлөлд шилжүүлэх ажлыг эхлүүлээд байна. Энэ хүрээнд ялангуяа сургууль, цэцэрлэг цөөнтэй, шинээр суурьшиж буй долоон байршилд хэлцэл зарлаж, хоёр иргэн, дөрвөн аж ахуйн нэгж, байгууллагаас санал хүлээн авсан байна.

Нийслэлийн Засаг даргын Тамгын газрын дарга Д.Амгалан болон холбогдох албаныхан дээрх санал ирүүлсэн иргэн, байгууллагуудын барилга байгууламжтай газар дээр нь очиж танилцжээ. Тэрбээр “Өнөөдрийн байдлаар шаардлага өндөртэй байгаа байршлуудад цэцэрлэг, сургуулийн зориулалттай барилгуудыг судалж байна. Хэрвээ стандартын шаардлагыг хангавал цэцэрлэг, сургуулийг хичээлийн жил эхлэхээс өмнө ашиглалтад оруулж, хүртээмжийг нэмэгдүүлэх боломжтой. Тухайлбал, Сонгинохайрхан дүүргийн 29 дүгээр хороонд 950 орчим цэцэрлэгийн насны хүүхэд байгаагаас одоогийн цэцэрлэг нь 200 хүүхдийн хүчин чадалтай боловч 400 орчим хүүхэд хамруулж байна. Шинээр 240 ортой цэцэрлэг барьж байгаа ч дахин 300 гаруй хүүхдийг хүлээн авах шаардлага үүсээд байна” хэмээн онцоллоо.

Түрээсийн хэлцэл зарласан долоон байршил нь дараах байдалтай байна:

Цэцэрлэгийн зориулалттай барилгын байршлууд:

• Баянгол дүүрэг, 5 дугаар хороо

• Баянзүрх дүүрэг, 4 дүгээр хороо

• Хан-Уул дүүрэг, 15 дугаар хороо

• Хан-Уул дүүрэг, 23 дугаар хороо

• Сонгинохайрхан дүүрэг, 29 дүгээр хороо

• Сүхбаатар дүүрэг, 9 дүгээр хороо

Сургуулийн зориулалттай барилгын байршил:

• Баянзүрх дүүрэг, 25 дугаар хороо

Эдгээр байршилд хувийн хэвшлийн байгууллагуудын барьсан сургууль, цэцэрлэгийн зориулалттай барилгыг нийслэл түрээсийн үндсэн дээр төрийн өмчид шилжүүлж, цэцэрлэг, сургуулийн орон тоог нэмэгдүүлэх, шинээр хүүхэд авах боломжоор хангахаар зорьж байна.

Эх сурвалж: Нийслэлийн ЗДТГ