Сүүлийн үед аяллын бэлтгэлд зөвхөн чемодан баглах бус, хайртай тоглоомоо даатгуулах шаардлага ч нэмэгдэж байна. Ялангуяа Лабубу тоглоомын эзэд гадаад, дотоодоор явахдаа уг тоглоомыг хулгайд алдах вий гэхээс эмээж, тусгайлан даатгуулдаг болсон тухай New York Post сонин мэдээлжээ.

PassportCard аялал жуулчлалын даатгалын компанийн тайланд дурдсанаар миллениал болон зумер үеийн гурван хүний нэг нь Лабубугаа даатгуулахыг сонирхож буйг онцолсон байна. Үүний гол шалтгаан нь Лабубугийн эрэлт эрс өсөж, хулгайн тохиолдол дагаад нэмэгдсэн явдал ажээ. Уг тоглоомын эрэлт, шуугиан хэдий чинээ өндөр байна, төдий хэмжээгээр эзэмшигчдийн хувьд эрсдэл үүсч байна. Бүр нэг үе Их Британид Лабубуг худалдаалахыг түр зогсоох хүртэл арга хэмжээ авч байсан нь үүнийг батлана. Үйлдвэрлэгч талын тайлбарласнаар, хэт урт дараалал, бөөгнөрөл нь хэрэглэгчдийн тав тух, эрүүл мэндэд сөргөөр нөлөөлж болзошгүй байсан тул ийм шийдвэр гаргасан гэв.

Лабубу одоо онлайн худалдааны сайтуудад 652 ам.долларын үнэтэйгээр зарагдаж байгаа нь тоглоомын үнэ цэнэ, эрэлт хосолсон ховор эд болсныг харуулж байна. Ийм өндөр үнэтэй, эрэлттэй тоглоомыг гадагш авч явахдаа хулгайд алдах, гэмтээх, орхигдуулах эрсдэл нэмэгдэх тул даатгал хийлгэх нь амар тайван аяллын нэг чухал хэсэг болжээ.

Лабубугийн тухайд, молтогчингоо санагдуулам том чихтэй, ярзгар шүдтэй энэ тоглоомыг 2015 онд Гонконгийн зураач Кесин Лунг анх бүтээж, 2019 онд Хятадын Pop Mart компанитай хамтран албан ёсоор үйлдвэрлэж эхэлсэн юм. Ази тивд эрчимтэй алдаршсан Лабубу одоо дэлхийн бусад зах зээлийг ч байлдан дагуулж, тоглоомын урлагт шинэ давалгаа авчирч байна.

Эх сурвалж: New York Post, officelife.media