Хятадын “Yongle International Auction” төвөөс энэ долоо хоногт зохион байгуулсан дуудлага худалдаагаар 131 см хэмжээтэй хүн шиг том “Лабубу” хүүхэлдэй 1.08 сая юаниар буюу 150,324 ам.доллараар зарагдсан талаар мэдээлжээ. Энэ нь ийм төрлийн тоглоомын хувьд дэлхийд тогтоогдсон хамгийн өндөр үнэ болохыг зохион байгуулагчид онцолсон байна.
Уг тоглоомыг арван жилийн өмнө Хонконгийн уран бүтээлч Касинг Лун бүтээсэн бөгөөд “мангасын төрхтэй” өвөрмөц дүрээрээ танигджээ. Хожим нь Хятадын “Pop Mart” компани тус хүүхэлдэйг худалдаанд гаргасан бөгөөд анхны үнэ нь ердөө 50 орчим юань байсан аж. Гэвч сүүлийн жилүүдэд энэ хүүхэлдэй олны танил хүмүүсийн сонирхлыг татаж, дэлхий дахинд хурдацтай алдаршсан юм.
Уг дуудлага худалдаа бүхэлдээ “Лабубу” тоглоомд зориулагдсан бөгөөд 48 төрлийн барааг үнэ хаялцуулан нийт 200 орчим хүн оролцсон байна. Дуудлага худалдааны эцэст 3.37 сая юань цугларчээ.
“Лабубу”-гийн алдарт хүрсэн нэг шалтгаан нь олон улсын оддын анхаарлыг татсан явдал байв. Өмнөд Солонгосын “Blackpink” хамтлагийн гишүүн Лиза уг хүүхэлдэйтэй зургаа нийтэлж, түүнийг даган Рианна, Дуа Липа зэрэг дуучид, Английн хөлбөмбөгийн шигшээ багийн ахлагч асан Дэвид Бекхэм хүртэл “Instagram”-т цүнхэндээ зүүсэн “Лабубу”-гийн зураг тавьсан байна. Улмаар “TikTok”-т трэнд болж, олон улсын зах зээлд борлуулалт нь огцом нэмэгджээ.
Энэхүү амжилт нь “Pop Mart” компанийн орлогод ч хүчтэй нөлөөлсөн бөгөөд 2024 онд тэдний орлого 13 сая юаньд хүрч, өмнөх оныхоос хоёр дахин өссөн байна. Мөн тус компани өнгөрсөн онд Итали, Испани зэрэг таван улсад шинэ дэлгүүр нээжээ.
Эх сурвалж: BBC
