Боловсрол, шинжлэх ухааны яам, Монголын багш нарын холбоо болон М банк хамтран багш нарын нийгмийн хамгаалал, эдийн засгийн ачааллыг бууруулах зорилготой хөнгөлөлт, урамшууллын картын хөтөлбөрийг хэрэгжүүлэхээр боллоо. Энэхүү хөтөлбөр нь төрийн болон хувийн хэвшлийн бүх шатны боловсролын байгууллагад ажиллаж буй багш нарт хамаарах бөгөөд тусгай хөнгөлөлтийн карт олгох байдлаар хэрэгжинэ.

Уг картыг эзэмшсэн багш нар өдөр тутмын хэрэглээ, эрүүл мэнд, тээвэр, цахилгаан бараа, харилцаа холбоо, амралт зугаалгын зэрэг өргөн хүрээний үйлчилгээ, бүтээгдэхүүнд хөнгөлөлттэй үнээр үйлчлүүлэх боломжтой болох юм. Хөтөлбөр нь зөвхөн багш нарт хөнгөлөлт үзүүлэхээс гадна, хувийн хэвшлийн байгууллагуудын нийгмийн хариуцлагыг нэмэгдүүлэх, боловсролын салбарын ажилчдын ажлын нөхцөл, эдийн засгийн дэмжлэгийг сайжруулах ач холбогдолтой.

Одоогийн байдлаар дараах төрийн бус болон хувийн байгууллагууд уг хөтөлбөрт нэгдэхээ илэрхийлээд байна:

• CU сүлжээ дэлгүүр

• UB Cab

• Sain electronics

• Sain motors

• Монос

• Номин холдинг

• Юнител

• BTF International

• Monkh motors

• Хувийн “Дөрөвдүгээр эмнэлэг”

• Эрдэнэт хивс, Эрдэнэт кашмер

• “Мөрөөдөл” хүүхдийн зуслан

Цаашид энэхүү хөтөлбөрт нэмэлт байгууллагууд нэгдэж, багш нарт олгогдох хөнгөлөлтийн хүрээ улам өргөжих төлөвтэй байна. Боловсролын салбарын тогтвортой байдлыг дэмжих энэхүү алхам нь багш нарын хөдөлмөрийн үнэлэмжийг бодитоор дээшлүүлэх шинэ арга хэмжээ болж байгааг зохион байгуулагчид онцолж байна.

Эх сурвалж: Боловсрол, шинжлэх ухааны яам