Онцгой байдлын ерөнхий газрын харьяа Үндэсний аврах бригадад шинээр томилогдсон офицер, ахлагч нарт зориулсан цэргийн бэлтгэл, сургуулилт амжилттай зохион байгуулагдлаа. Энэхүү сургалтын зорилго нь алба хаагчдад цэргийн нийтлэг дүрэм, жагсаалч байдал, албаны ёс зүйн хэм хэмжээг эзэмшүүлж, онцгой байдлын албаны үндсэн зарчим, дэг журам, хамт олны нэгдэл, сахилга хариуцлагыг төлөвшүүлэхэд чиглэжээ.

Арга хэмжээнд ОБЕГ-ын дэд дарга, хурандаа Ц.Уранчимэг оролцож, төгсөлтийн ёслолд хэлсэн үгэндээ: “Та бүхэн хэдхэн долоо хоногийн өмнө энгийн иргэдийн дүрээр байгууллагынхаа босгыг давж байсан бол өнөөдөр эх орныхоо өмнө тангараг өргөсөн, цэргийн үндсэн мэдлэг, дадлага, эв нэгдлийг биеэр мэдэрсэн, мэргэжлийн албан хаагчид боллоо. Эх орныхоо төлөө өөрийн амь бие, зориг санаагаа зориулах нь Үндсэн хууль, цэргийн дүрмээ чандлан сахих, төр ард түмний итгэлийг хариуцлагатайгаар биелүүлэх үүрэг юм” хэмээн онцоллоо. Тэрбээр мөн залуу алба хаагчдын ард үргэлж дэмжиж, тэдний ар тал болж байдаг гэр бүл, ойр дотныхон нь Монгол цэргийн үнэнч тулгуур хүч гэдгийг ч дурдсан юм.

Сургалтад төв болон орон нутгийн Онцгой байдлын байгууллагад шинээр томилогдсон нийт 69 алба хаагч хамрагдаж, 21 хоногийн хугацаанд онолын мэдлэг, жагсаалын болон цэргийн дүрмийн бэлтгэл, бие бялдрын хичээлүүдийн дагуу бэлтгэгдсэн байна. Сургалтын төгсгөлд алба хаагчид төрийн далбааны өмнө тангараг өргөж, Онцгой байдлын албаны бүрэн эрхт гишүүн боллоо.

Эх сурвалж: ОБЕГ