Парис болон бусад хотуудад өрнөж буй “шар хантаазтан” иргэдийн бослого тэмцэлтэй холбогдуулан Францын ерөнхийлөгч Эммануэл Макрон өнөөдөр орой телевизээр ард иргэддээ хандаж үг хэлнэ. Франц даяар сар орчим хугацаанд үргэлжилж буй тэмцэл нь эхэндээ шатахууны татварыг нэмэхийн эсрэг байсан бол сүүлдээ амьжиргааны өртөг нэмэгдэж байгааг зогсоохын төлөө болж хувирсан юм.

Өнгөрсөн Бямба гаригт орон даяар шар хантаазтангуудын тэмцлийг дэмжиж 136 мянга орчим иргэд гудамжинд гарч, 1200 гаруй хүн баривчлагдсан байна. Нийслэл Парис хот хамгийн их хохирол амсч, барилгын цонхнууд хагарч, автомашинууд шатаж, дэлгүүрүүд тоногдсон юм. Парист 10 мянга орчим хүн жагссан байна. Сангийн сайд Бруно Ле Мэйр нөхцөл байдлыг “бизнес, эдийн засгийн сүйрэл” гэж тодорхойлжээ.

Ерөнхийлөгч Макрон өнөөдөр тус улсын гол таван үйлдвэрчний эвлэл, гурван том ажлын байр зуучлалын байгууллагын төлөөлөл болон орон нутгийн албан хаагчидтай уулзана. Уулзалтад Францын ерөнхий сайд Эдуард Филипп, засгийн газрын есөн сайд оролцохоор болжээ. Тэмцлийн турш Макрон хөшигний ард байж, шууд мэдэгдэл хийхээс зайлсхийж, шар хантаазтангууд түүнийг огцрохыг шаардаж байв.

Өнгөрсөн долоо хоногийн эхээр Францын засгийн газар шатахууны татварыг нэмэх хугацаагаа зургаан сараар хойшлуулах шийдвэр зарласан ч тэмцэл зогсоогүй. Францад дизель түлшний үнэ сүүлийн 12 сарын хугацаанд 23 хувиар өссөний дээр Ерөнхийлөгч Макроны шийдвэрээр ирэх оны нэгдүгээр сарын 1-нээс дизель түлшний татварыг 6.5 хувиар, бензиний татварыг 2.9 хувиар өсгөхөөр болсон юм. Шатахууны татварыг нэмсэн нь сэргээгдэх эрчим хүчний хөрөнгө оруулалтыг нэмэгдүүлэх зорилготой байв. Гэвч энэ шийдвэр ард иргэдийн тэсвэр тэвчээрийг барж, гудамжинд гарч тэмцэхэд хүргэсэн юм. Санал асуулгаар францчуудын 66 хувь шар хантаазтан иргэдийн тэмцлийг дэмжиж, харин Эммануэл Макроны үнэлгээ 23 хувь болж буураад байна. Тиймээс өнөөдрийн шуурхай хуралдаанаас гаргасан шийдвэрээ Макрон 20:00 цагт телевизийн сувгаар иргэдэд хандаж үг хэлэхдээ зарлах гэнэ.

Эх сурвалж: BBC