Монгол Улсад үндэсний мөнгөн тэмдэгт “төгрөг”-ийг гүйлгээнд гаргасны 100 жилийн ойн хүрээнд Монголбанкнаас түүхэн ач холбогдол бүхий “1 төгрөг” дурсгалын зоосыг алт, мөнгөөр цутган худалдаанд гаргалаа. Энэхүү дурсгалын зоос нь 1925 оны арванхоёрдугаар сарын 9-нд гүйлгээнд гарч байсан 18 грамм жинтэй, 900 сорьцтой мөнгөн “1 төгрөг” зоосны түүхэн дүр төрхийг орчин үеийн өндөр технологитой хослуулан бүтээсэн онцлогтой.

Дурсгалын зоосыг “Smartminting ultra high relief” хэмээх хэт өндөр товойлгогч технологи ашиглан, 1 унц буюу 31.1 грамм жинтэй, 33 мм диаметртэй, 999.9 сорьцын алт болон мөнгөөр тус тус цутгажээ. Энэ нь зөвхөн түүхэн үнэ цэнээр зогсохгүй, цуглуулагчид болон сонирхогчдын анхаарлыг татахуйц ур хийцтэй бүтээгдэхүүн болсон байна.

Монголбанк мөнгөн тэмдэгтийн 100 жилийн ойг олон нийтэд хүргэх, хүүхэд залууст түүний талаарх мэдлэг олгох зорилгоор шинээр танхим байгуулсан бөгөөд тус танхимд анхны “1 төгрөг”-ийн хэв, зоос, мөнгөний нууцлал, алтны хэмжүүр, тухайн үеийн “Үнэн” сонин зэрэг сонирхолтой үзмэрүүдийг дэлгэн байршуулжээ.

Монголбанк энэ түүхэн үйл явдлыг тэмдэглэн өнгөрүүлэхдээ мөнгөн тэмдэгт нь зөвхөн төлбөрийн хэрэгсэл бус, тухайн улсын соёл, тусгаар тогтнол, эдийн засгийн хөгжил дэвшлийг илтгэгч үндсэн бэлгэдэл болдгийг онцолсон байна.

Эх сурвалж: Монголбанк