Хятадын шүхэрчин, 55 настай Пэн Южиан 2025 оны тавдугаар сарын 24-нд баруун хойд нутгийн Чилиан уулсын дээгүүр шинэ төрлийн шүхэр туршиж байх үед ховор агаар мандлын үзэгдэлтэй таарчээ. “Үүл рүү сорогдох” гэж нэрлэгддэг хүчтэй дээш чиглэсэн агаарын урсгал түүнийг 8500 метрийн өндөрт хүртэл хөөргөсөн байна. Энэ нь дэлхийн дээвэр гэгддэг Эверестийн оргил (8849 м)-д бараг дөхсөн үзүүлэлт бөгөөд шүхэртэй хүн ийм өндөрт гарсан нь туйлын ховор тохиолдол юм.

Энэ үйл явдал шүхэрт суурилуулсан камераар бүрэн бичигдсэн бөгөөд Хятадын “Douyin” сүлжээнд тавигдмагцаа олон сая хүний анхаарлыг татжээ. Бичлэг дээр Пэн Южианы нүүр, бие мөсөн талст бүрхэж, цасан шуурганд өртсөн мэт байдалтай харагдана. Тухайн үед агаарын температур -40 хэм хүрч, хүчилтөрөгчийн хэмжээ маш бага байсан нь түүний амь насыг аюулд оруулсан байна.

Пэн Южиан сэтгэгдлээ хуваалцахдаа:
“Айдас төрмөөр байлаа. Бүх зүйл цагаан, юу ч харагдахгүй. Луужингүй байсан бол хаашаа явж байгаагаа ч ойлгохгүй байлаа. Би доош буух гэж хичээсэн ч улам л дээш хөөрөөд байсан” хэмээн өгүүлжээ.

Тэрбээр шүхрээр дөрвөн жил хагас хичээллэж байгаа бөгөөд энэ удаагийн нислэг нь анхнаасаа зөвшөөрөлгүй, өндөрт гарах зорилгогүй, туршилтын зорилготой байсан аж. Гэвч хүчтэй салхи түүнийг хүчээр дээш өргөж, ийнхүү 8500 метрийн өндрөөс амьд бууж ирсэн нь түүнийг азтай нэгэн болохыг илтгэнэ.

Гэхдээ энэ нислэг нь хууль бус байсан тул Хятадын эрх баригчид түүний шүхэрдэх эрхийг зургаан сараар түдгэлзүүлжээ.

Энэ явдал нь байгалийн хүч хэрхэн хүний хяналтаас давж болдгийг, мөн хүний бие хүнд нөхцөлд хэрхэн тэсвэрлэх чадвартайг тодхон харуулсан, дахин давтагдахад ховор тохиолдол хэмээн мэргэжилтнүүд дүгнэж байна.

Эх сурвалж: BBC