Алдарт модель, дуучин Жастин Биберийн эхнэр Хейли Бибер өөрийн үүсгэн байгуулсан Rhode нэртэй гоо сайхны брендээ $1 тэрбумын үнэлгээгээр зарах гэрээ байгуулсан талаар Harper’s Bazaar сэтгүүл мэдээлжээ. Наймаа АНУ-ын гоо сайхны томоохон үйлдвэрлэгч e.l.f. Beauty компанитай хийгдсэн бөгөөд Хейли уг наймааны үр дүнд 600 сая ам.долларыг бэлнээр, 200 саяыг хувьцаагаар, цаашид брендын борлуулалт өсвөл нэмэлтээр дахиад 200 саяыг авах нөхцөлтэйгээр хэлцэл байгуулжээ.
Хейли Бибер 2022 онд Rhode брендээ албан ёсоор танилцуулсан бөгөөд богино хугацаанд цахим орчин, нийгмийн сүлжээнд хүчтэй маркетинг өрнүүлж, залуусын дунд танигдсан нэр хүндтэй бүтээгдэхүүн болгож чадсан юм. Ялангуяа уруулын блескийн дөрвөн төрлийн өнгө вирусын хандалттай бүтээгдэхүүн болж, брендын борлуулалтыг огцом өсгөсөн бол, Хейлигийн нэр дээр гаргасан гар утасны гэр хүртэл худалдаанд амжилт олсон нь анхаарал татаж байв.
Одоо Хейли шинэ эзэмшигч компанитайгаа хамтран Rhode ба e.l.f. Beauty компанийн уран сайхны захирал, стратегийн зөвлөх байхаас гадна инновацийн тасгийг удирдахаар болсон байна. Харин брендын үүсгэн байгуулагчид болох Майкл болон Лорен Рэтнер нар удирдлагын багт үлдэж, менежментийн үүргийг гүйцэтгэх аж.
Хейли Биберийн энэхүү наймаа нь түүнийг зөвхөн загварын ертөнцийн одоор зогсохгүй, амжилттай бизнес эрхлэгч гэдгийг баталсан үйл явдал боллоо. Түүний нийгмийн сүлжээнд тулгуурласан хүчтэй брэндинг, хувь хүний нэр хүнд нь Rhode брэндийг ердөө хоёрхон жилийн дотор 1 тэрбум долларын үнэлгээтэй компани болгоход чухал нөлөө үзүүлсэн хэмээн шинжээчид онцолж байна.
Эх сурвалж: Harper’s Bazaar, OfficeLife
