Дорноговь аймгийн Музей, сургалт, судалгааны төв иргэд, тэр дундаа хүүхэд, багачуудын соёлын боловсролыг нэмэгдүүлэх, түүх, зан заншлын мэдлэгийг нь гүнзгийрүүлэх зорилгоор “Музейн боловсролын хөтөлбөр”-ийг амжилттай хэрэгжүүлж байна.
Энэхүү хөтөлбөрт хамрагдсан хүүхдүүд “Миний монгол хувцас”, “Монгол гэр”, “Шагай наадгай” гэсэн гурван чиглэлийн үйл ажиллагаанд оролцож, монгол үндэстэн, ястнуудын хувцасны онцлог, уламжлалт гэрийн бүтэц, түүхэн хөгжлийн талаарх ойлголт, шагай наадгайн төрөл, алаг мэлхий өрөх аргыг оньсого, тоглоомын аргаар танин мэдэж байна. Үүгээр дамжуулан тэд үндэсний өв соёлын гүн гүнзгий мэдлэгийг сонирхолтой аргаар авч, ахисан түвшний боловсролтой болж байгаа юм.
Мөн тус музейн байнгын танхимд Хүннүгийн үед хамаарах археологийн ховор үзмэр, үлэг гүрвэл, яст мэлхий, эртний сүүн тэжээлтэн болон загас зэрэг сээр нуруутан амьтдын чулуужсан олдворуудыг дэлгэн үзүүлж, байгалийн түүхийн мэдлэгийг баяжуулж байна.
Ташрамд дурдахад, Дорноговь аймгийн Музей нь 1945 онд “Орон нутаг судлах кабинет” нэртэйгээр анх байгуулагдаж, 1979 онд музей болон өргөжсөн бөгөөд 1999 оноос хойш Музей, сургалт, судалгааны төв нэртэйгээр үйл ажиллагаагаа явуулж байна. Тус байгууллага энэ жил 80 жилийн ойтойгоо золгож, орон нутгийн боловсрол, соёлын чухал төв болон хөгжсөөр байна.
Эх сурвалж: Dornogovi.gov.mn
