Мэргэжлийн боловсролын сургууль, политехник коллежууд нь хөдөлмөрийн зах зээлд эрэлттэй, тэргүүлэх чиглэлийн мэргэжлүүдээр мэргэжилтэй ажилтан бэлтгэх сургалтыг эрчимжүүлэн зохион байгуулж байна гэж Боловсролын яамнаас мэдээллээ.

Эдгээр сургалтын байгууллагууд ажил олгогчийн захиалгаар тухайн байгууллагын ажилтан, насанд хүрсэн иргэдийг “хосмог сургалт”-д хамруулан, ажлын байран дээр нь сургах боломж олгож байгаа нь бодит хэрэгцээнд тулгуурласан боловсролын уян хатан хэлбэрийг бүрдүүлж байгаа юм.

Мөн суралцагчид сонгосон хөтөлбөрөөс гадна мэргэжлийн чиглэлээр нэмэлт хөтөлбөрт хамрагдан хос мэргэжил эзэмших боломжтой бөгөөд энэ нь ирээдүйд ажил эрхлэлт, ур чадварын давуу тал болохыг салбарын яам онцолж байна.

Ийнхүү мэргэжлийн боловсролын тогтолцоонд шинэчлэл, уян хатан зохицуулалт хийгдэж, зах зээлийн хэрэгцээтэй уялдсан чадварлаг боловсон хүчнийг богино хугацаанд бэлтгэх боломж улам бүр өргөжиж байна.

Эх сурвалж: Боловсрол, шинжлэх ухааны яам